အမေရိကန်နိုင်ငံသား ၄ ဦး ဆိုမာလီပြန်ပေးသမားပစ်သတ်

အမေရိကန် ရေတပ် ဒု-ဗိုလ်ချုပ်ကြီး Mark Fox
Source Photo from http://www.google.com/images

ပြန်ပေးဆွဲခံ အမေရိကန် နိုင်ငံသား ၄ ဦးကို

ဆိုမာလီ ပင်လယ်ဓားပြတွေ ပစ်သတ်

By ဗွီအိုအေ (မြန်မာဌာန)
အင်္ဂါ, 22 ဖေဖော်ဝါရီ 2011

ဆိုမာလီယာ ကမ်းရိုးတန်း တနေရာမှာ ပင်လယ်ဓားပြတွေ ပြန်ပေးဆွဲထားတဲ့ ရွက်လှေတစီးမှာ ပါဝင်သူ အမေရိကန် နိုင်ငံသား ၄ ဦးလုံး အသတ်ခံခဲ့ရတယ်လို့ အမေရိကန် စစ်တပ်က ပြောပါတယ်။

ဓားစာခံတွေ ပြန်လွတ်မြောက်ရေး ဆိုမာလီ ပြန်ပေးဆွဲသမားတွေနဲ့ အမေရိကန် ရေတပ်က ညှိနှိုင်းနေတုန်း ဘာမှ အချက်မပေးဘဲ အမေရိကန် စစ်သင်္ဘောကို ပင်လယ်ဓားပြတွေက RPG ဒုံးကျည်နဲ့ စပစ်ခဲ့တယ်လို့ အမေရိကန် ရေတပ် ဒု-ဗိုလ်ချုပ်ကြီး မာ့ခ် ဖောက်စ် (Mark Fox) က သတင်းသမားတွေကို ပြောပါတယ်။ အဲဒီဒုံးကျည်က သင်္ဘောကိုပစ်တာ လွဲသွားခဲ့ပါတယ်။ ဒါပေမဲ့ ရွက်လှေပေါ်က သေနတ်ပစ်သံတွေကို ကြားခဲ့ရတယ်လို့ ဆိုပါတယ်။

အမေရိကန် အထူးတပ်သားတွေ ပြန်ပေးဆွဲထားတဲ့ ရွက်လှေပေါ်ကို ရောက်တဲ့အခါမှာ ဓားစားခံတွေ ၄ ဦးလုံး သေနတ်နဲ့ အပစ်ခံထားရတာကို တွေ့ခဲ့ရပါတယ်။ ဆေးတပ်သားတွေက ချက်ချင်း ကုသကြပေမဲ့လည်း ဒဏ်ရာတွေကြောင့် အားလုံး သေဆုံးခဲ့ကြရပါတယ်။

ရွက်လှေကို ၀င်စီးနင်းခဲ့တဲ့ အမေရိကန် တပ်သားတွေနဲ့ ပင်လယ်ဓားပြတွေ အပြန်အလှန် ပစ်ခတ်ကြပြီး ပင်လယ်ဓားပြ ၂ ဦး သေဆုံးခဲ့ပါတယ်။ ၁၅ ဦး အရှင်ဖမ်းမိပါတယ်။ နောက်ထပ် ပင်လယ်ဓားပြ ၂ ဦးလည်း သေဆုံးနေတာကို တွေ့ရတယ်လို့ ဆိုပါတယ်။

ပြီးခဲ့တဲ့ သောကြာနေ့က ဆိုမာလီယာ ကမ်းရိုးတမ်းဘက်ကို မောင်းနှင်လာခဲ့တဲ့ ရွက်လှေကို ပင်လယ်ဓားပြ တွေက ပြန်ပေးဆွဲခဲ့တာပါ။ အမေရိကန် ရေတပ်သင်္ဘော ၄ စီးကလည်း နောက်ယောင်ခံ လိုက်ခဲ့ကြတာပါ။

Find this article at:
http://www.voanews.com/burmese/news/us-somalia-hijacked-116702084.html

ဖတ်ဖို့ ရှေ့တွင်ရှိသေးသည်-နှိပ်ပါ....

ပြန်ခေါက်ထားစေချင်သည် ...

ထိုင်းနယ်စပ် တင်းကျပ်မည်ဖြစ်ကြောင်း ထိုင်းကြေညာ

ထိုင်းနယ်စပ် တင်းကျပ်မည်ဖြစ်ကြောင်း ထိုင်းကြေညာ





Source Audio from http://www.bbcburmese.com

ဖတ်ဖို့ ရှေ့တွင်ရှိသေးသည်-နှိပ်ပါ....

ပြန်ခေါက်ထားစေချင်သည် ...

ILO အဆင့်မြင့်အရာရှိအဖွဲ့ မြန်မာနိုင်ငံကို ရောက်ရှိ

ILO ဒုတိယ ညွှန်ကြားရေးမှူးချုပ် Guy Ryder
Source Photo from http://www.google.com/images

ILO အဆင့်မြင့်အရာရှိအဖွဲ့

မြန်မာနိုင်ငံကိုရောက်ရှိ

2011-02-22

မြန်မာနိုင်ငံက အလုပ်သမားအရေးနဲ့ ကလေးစစ်သား ပပျောက်ရေး လုပ်ငန်းစဉ်တွေ ဆွေးနွေးဖို့ အတွက် အပြည်ပြည်ဆိုင်ရာ ကမ္ဘာ့ အလုပ်သမားအဖွဲ့ချုပ် (ILO) ရဲ့ အဆင့်မြင့် ကိုယ်စားလှယ်အဖွဲ့ ဒီကနေ့ ဖေဖော်ဝါရီ ၂၂ ရက် ညနေပိုင်းမှာ မြန်မာနိုင်ငံကို ရောက်ရှိမယ်လို့ ရန်ကုန် ILO ရုံးက ပြောပါတယ်။

ဒီကိုယ်စားလှယ်အဖွဲ့ဟာ မြန်မာနိုင်ငံမှာ ၃ ရက်ကြာ နေထိုင်မှာ ဖြစ်ပြီး အဓိက လာရောက်တဲ့ ရည်ရွယ်ချက်တွေထဲမှာ ရန်ကုန်မှာ ရုံးဖွင့် ဆောင်ရွက်နေတဲ့ ILO ဌာနခွဲရဲ့ လုပ်ငန်းတွေကို နောက်ထပ် သက်တမ်း ၁ နှစ်တိုးရေး သဘောတူ စာချွန်လွှာ လက်မှတ်ထိုးဖို့လည်း ပါတယ်လို့ မြန်မာနိုင်ငံဆိုင်ရာ ဌာနေကိုယ်စားလှယ် Mr. Steve Marshall က RFA ကို ပြောပါတယ်။

ခရီးစဉ် ကြိုတင် ပြင်ဆင်ထားချက်အရ ဒီ ILO အဆင့်မြင့် ကိုယ်စားလှယ်အဖွဲ့ဟာ မြန်မာနိုင်ငံ အစိုးရ အာဏာပိုင် အရာရှိတွေ၊ အစိုးရ လက်အောက်ခံ ကော်မတီအဖွဲ့တွေ၊ စီးပွားရေး လုပ်ငန်းရှင်တွေနဲ့ အလုပ်သမားရေး ဆောင်ရွက်နေသူတွေနဲ့ တွေ့ဆုံမှာ ဖြစ်ပြီး မြန်မာနိုင်ငံမှာ ILO ရဲ့ မူလ တာဝန်ဝတ္တရားတွေ ဆက် ထမ်းဆောင်ရေး သဘောတူစာချုပ် သက်တမ်းတိုးဖို့လည်း အဓိက ပါဝင်တယ်လို့ Mr. Steve Marshall က ပြောပါတယ်။

ဒီကိုယ်စားလှယ်အဖွဲ့မှာ ILO အဖွဲ့ ဒုတိယ ညွှန်ကြားရေးမှူးချုပ် Guy Ryder ဦးဆောင်ပါဝင်ပြီး ဖေဖော်ဝါရီ ၂၅ ရက် သောကြာနေ့ ညနေမှာ မြန်မာနိုင်ငံက ထွက်ခွာမယ်လို့ သိရပါတယ်။

ILO အဖွဲ့ကြီးဟာ မြန်မာနိုင်ငံက ကလေးစစ်သား စုဆောင်းမှု၊ အတင်းအဓမ္မ ခိုင်းစေမှုနဲ့ မြေယာ အတင်းအကျပ် ရွှေ့ပြောင်းမှု၊ သိမ်းဆည်းမှုတွေကို စစ်အစိုးရ အာဏာပိုင်တွေနဲ့ သဘောတူညီချက် ရယူပြီး ဦးဆောင် ဖြေရှင်းနေတဲ့ နိုင်ငံတကာ အဖွဲ့ကြီးတရပ် ဖြစ်ပါတယ်။

Copyright © 1998-2011 Radio Free Asia. All rights reserved.

ဖတ်ဖို့ ရှေ့တွင်ရှိသေးသည်-နှိပ်ပါ....

ပြန်ခေါက်ထားစေချင်သည် ...

မြန်မာနိုင်ငံမှာ တရုတ်အများဆုံးရင်းနှီး

Source Photo from http://www.news-eleven.com

မြန်မာပြည်တွင်း တရုတ်ရင်းနှီးမှု အများဆုံး

By ကျော်ကျော်သိန်း
အင်္ဂါ, 22 ဖေဖော်ဝါရီ 2011

တရုတ်နိုင်ငံဟာ မြန်မာနိုင်ငံမှာ အများဆုံး ရင်းနှီးမြှုပ်နှံတဲ့နိုင်ငံ ဖြစ်သွားပါပြီ။ အရင်က ရင်းနှီးမြှုပ်နှံမှု အများဆုံး ဖြစ်ခဲ့တဲ့ ထိုင်းနိုင်ငံကို ကျော်ပြီး ထိပ်တန်း ရင်းနှီးမြှုပ်နှံတဲ့နိုင်ငံ ဖြစ်လာတာပါ။ ဒါပေမဲ့လည်း တရုတ်ရဲ့ ရင်းနှီးမြှုပ်နှံမှု အများဆုံး ကဏ္ဍတွေက ရေအားလျှပ်စစ် ထုတ်လုပ်ရေးနဲ့ ရေနံနဲ့ သဘာဝဓာတ်ငွေ့ ထုတ်လုပ်ရေး လုပ်ငန်းတွေမှာ ဖြစ်တာကြောင့် ဒီ ရင်းနှီးမြှုပ်နှံမှုတွေကို မေးခွန်းထုတ်တာတွေ၊ ကန့်ကွက် ဆန့်ကျင်တာတွေကလည်း တောက်လျှောက် ရှိနေခဲ့ပါတယ်။ အပြည့်အစုံကိုတော့ ဘန်ကောက်ကနေ ကိုကျော်ကျော်သိန်းက သတင်းပို့ထားပါတယ်။

တရုတ်နိုင်ငံဟာ ပြီးခဲ့တဲ့ ၂ လအတွင်း အမေရိကန်ဒေါ်လာ ၃ ဘီလီယံကျော် ရင်းနှီးမြှုပ်နှံပြီး ရင်းနှီးမြှုပ်နှံမှု အများဆုံး နိုင်ငံအဖြစ် ၇ နှစ်ဆက်တိုက် ရပ်တည်လာခဲ့တဲ့ ထိုင်းနိုင်ငံကို ကျော်တက်သွားတာ ဖြစ်တဲ့အကြောင်း မြန်မာနိုင်ငံ၊ ကုန်သည်များနဲ့ စက်မှုလက်မှု လုပ်ငန်းရှင်များ အသင်းချုပ်က တာဝန်ရှိသူတဦး ပြောတာကို ကိုးကားပြီး ပြည်တွင်းထုတ် Weekly Eleven သတင်းဂျာနယ်မှာ ဖော်ပြထားပါတယ်။ အခုဆိုရင် ထိုင်းရဲ့ ရင်းနှီးမြှုပ်နှံမှုက အမေရိကန်ဒေါ်လာ ၉.၅ ဘီလီယံရှိပြီး တရုတ်ကတော့ ၉.၆ ဘီလီယံကျော် ရှိသွားပြီလို့ သတင်းက ဆိုပါတယ်။

တရုတ်က နောက်ဆုံး ရင်းနှီးမြှုပ်နှံလိုက်တဲ့ ဒေါ်လာ ၃ ဘီလီယံကျော်ဟာ လျှပ်စစ်စွမ်းအား ကဏ္ဍမှာ ဖြစ်တယ်လို့ ကုန်သည်များနဲ့ စက်မှုလက်မှု လုပ်ငန်းရှင်များ အသင်းချုပ် တာဝန်ရှိသူကပဲ ပြောထားပါတယ်။

အနောက်နိုင်ငံတွေက ရင်းနှီးမြှုပ်နှံမှုတွေ ထပ်လာဖို့ မရှိသေးတာကြောင့် တရုတ်နဲ့ အရှေ့တောင်အာရှ ဒေသတွေထဲက ရင်းနှီးမြှုပ်နှံမှုတွေပဲ အများဆုံး ရှိနေဦးမှာ ဖြစ်တယ်လို့ စီးပွားရေးပညာရှင် တဦးဖြစ်တဲ့ ဦးခင်မောင်ညိုက ပြောပါတယ်။

“လောလောဆယ်ကတော့ တရုတ်မများရင်လည်း အာဆီယံ များမှာပဲ။ အာဆီယံ မများရင်လည်း တရုတ်များမှာပေါ့လေ။ ဒါပဲရှိတာပဲလေ။ ဥရောပတို့ အမေရိကန်တို့က လောလောဆယ် များမယ့်အလားအလာ မရှိသေးဘူး။ မရှိတော့ တခါတလေကျရင် တရုတ်က တက်သွားမယ်၊ တခါတလေကျရင် အာဆီယံက တက်မယ်။ ဒီလိုပဲ ဖြစ်နိုင်တယ်လို့ ယူဆပါတယ်။ နောက်တခုကတော့ သူတို့ဘက်က ကြည့်ရင်တော့ သူတို့အကျိုးရှိတဲ့ ရင်းနှီးမြှုပ်နှံမှုပဲ သူတို့ လုပ်မှာပေါ့လေ။ သူတို့လိုချင်တဲ့ ရင်းနှီးမြှုပ်နှံမှုမျိုးကို သူတို့ လုပ်တာပေါ့။ သူတို့အတွက်လည်း အကျိုးရှိတယ်၊ မြန်မာနိုင်ငံက လက်ခံတယ် ဆိုတာလည်း မြန်မာနိုင်ငံအတွက် အကျိုးရှိလို့ လုပ်တာလို့ ယူဆပါတယ်။”

မြန်မာနိုင်ငံက အဓိကမြစ်ကြီးတွေပေါ်မှာ တရုတ်ရဲ့ ရေအားလျှပ်စစ် ထုတ်လုပ်ရေး စီမံကိန်းတွေကြောင့် ဒေသခံ ထောင်ပေါင်းများစွာ အိုးအိမ် ရွှေ့ပြောင်းကြရတာတွေ၊ လူတွေရဲ့ နေထိုင်မှုနဲ့ အသက်မွေးဝမ်းကြောင်းမှုတွေကို ထိခိုက်တာတွေ၊ သဘာဝ ပတ်ဝန်းကျင်ကို ထိခိုက်ပျက်စီးတာတွေ အကြီးအကျယ် ရှိနေတယ်ဆိုပြီး ဝေဖန်ခံနေရတာ ဖြစ်ပါတယ်။

Source Photo from http://www.news-eleven.com

မြန်မာအတွက်ရော၊ တရုတ်အတွက်ပါ နှစ်ဦးနှစ်ဘက် အကျိုးရှိလို့ ရင်းနှီးမြှုပ်နှံမှု လက်ခံတဲ့သူက လက်ခံ၊ လုပ်တဲ့သူက လုပ်ကြတာ ဆိုပေမဲ့ အဲဒီ ရင်းနှီးမြှုပ်နှံမှုတွေဟာ မြန်မာတနိုင်ငံလုံးက လူထုများရာစုကြီး မဆိုထားနဲ့၊ စီမံကိန်းတွေရှိတဲ့ ဒေသတွေက လူထုအတွက်တောင် အကျိုးမဖြစ်ဘဲ တရုတ်အစိုးရ ကျောထောက်နောက်ခံ ပေးထားတဲ့ တရုတ်ကုမ္ပဏီတွေနဲ့ မြန်မာစစ်အစိုးရ အာဏာ တည်တံ့ခိုင်မြဲရေး အတွက်ပဲ အထောက်အပံ့ ဖြစ်စေတယ်လို့ ကန့်ကွက်သူတွေက ထောက်ပြနေကြတာပါ။

အဆိုးဆုံးကတော့ သဘာဝပတ်ဝန်းကျင်အပေါ် သက်ရောက်မှုတွေကို ထည့်သွင်း စဉ်းစားတာတွေ၊ ကြိုတင်ပြီးတော့ တိုင်းတာ စစ်ဆေး တွက်ချက်တာတွေ လုံးဝ မလုပ်ခဲ့တဲ့အတွက် သဘာဝပတ်ဝန်းကျင် ထိခိုက်ပျက်စီးတာတွေ ဖြစ်နေရပြီလို့ လှုပ်ရှားသူတွေကတော့ ဝေဖန်ပါတယ်။

“ဒီစီမံကိန်းတွေ အကုန်လုံးက စစ်အစိုးရက ထိန်းချုပ်ထားပြီးသား စီမံကိန်းတွေ ဖြစ်တယ်။ ဒီစီမံကိန်းတွေဟာ သဘာဝ ပတ်ဝန်းကျင် ဆုံးရှုံးမှုကို ပိုပြီးတော့မှ ဖြစ်ပေါ်လာမယ်။ ဒီစီမံကိန်းကြီး ဆောက်တဲ့နေရာမှာဆိုရင် သဘာဝ ပတ်ဝန်းကျင်ဆိုးကျိုး ဆိုင်ရာတွေ သုတေသနလုပ်တာ လုံးဝမရှိဘူး။ နောက်ပြီး လူထု အသိုင်းအ၀ိုင်းက ဘယ်လိုဆိုးကျိုး ဖြစ်နေသလဲဆို လွတ်လပ်စွာ လုပ်လို့ မရဘူးပေါ့။”

မြန်မာနိုင်ငံ မြစ်ကြီးများကွန်ယက် အဖွဲ့က စည်းရုံးလှုံ့ဆော်ရေးမှူး ကိုစိုင်းစိုင်း ပြောပြသွားတာ ဖြစ်ပါတယ်။

မြန်မာနိုင်ငံရဲ့ အဓိကမြစ်ကြီးဖြစ်တဲ့ ဧရာဝတီမြစ် စပြီး မြစ်ဖျားခံတဲ့ မြစ်နှစ်သွယ် ဆုံတဲ့နေရာမှာ မြစ်ဆုံရေကာတာ ဆောက်ပြီး ရေအားလျှပ်စစ်ထုတ်ဖို့ ၂၀၀၉ ခုနှစ်၊ အောက်တိုဘာလကတည်းက တရုတ်နဲ့ မြန်မာ ကုမ္ပဏီတွေ စလုပ်နေခဲ့တာဖြစ်ပြီး အဲဒီအချိန်ကတည်းကကို ဒေသခံလူထုက စီမံကိန်းကို ကန့်ကွက်နေခဲ့တာပါ။ လူထုက ဘာ့ကြောင့် ကန့်ကွက်တာလဲဆိုတာ ဗွီအိုအေကို ရှင်းပြခဲ့သူကတော့ ကချင်ဖွံ့ဖြိုးတိုးတက်ရေး ကွန်ယက် (KDNG) ရဲ့ ဥက္ကဋ္ဌ ကိုအောင်ဝါ ဖြစ်ပါတယ်။

“ပထမအချက်ကတော့ ဒေသခံတွေရဲ့ အိမ်ခြံမြေ အကုန်လုံး ပြောင်းရွှေ့ခံရမယ်။ ဥယျာဉ်ခြံတွေ၊ နေရာတွေလည်း အဖျက်ခံရမယ်။ သဘာဝ ပတ်ဝန်းကျင်လည်း ဖျက်ဆီးခံရမယ်။ ဒုတိယအချက် အနေနဲ့တော့ မြစ်ဆုံဟာဆိုရင် ကချင်ပြည် ဒေသအတွက် အထူးအရေးကြီးတဲ့ဟာလည်း ဖြစ်တယ်။ နောက်တခုက ဒီမြစ်ဟာဆိုရင် မြန်မာပြည်အတွက် အဓိက မြစ်ကြီးတခုဖြစ်တယ်။ ဒါကြောင့် ဒီအပေါ်မှာတော့ မဆောက်သင့်ပါဘူး။”

တကယ်ကတော့ ဒေသတခုမှာ စီမံကိန်းကြီးတခု လုပ်တယ်ဆိုရင် အရင်ဆုံး အကျိုးခံစားခွင့် ရသင့်တာက ဒေသခံလူထု ဖြစ်တယ်ဆိုတာ ငြင်းမရတဲ့ ကိစ္စပါ။ တရုတ်ရဲ့ မြန်မာနိုင်ငံမှာ ရင်းနှီးမြှုပ်နှံမှုတွေက နေပြီးတော့ ဒေသခံတွေအတွက် ဘာအကျိုးအမြတ်မှ ရနေတာ မတွေ့ရဘူးလို့ ကိုအောင်ဝါက ဆက်ပြောခဲ့ပါတယ်။

တရုတ်အစိုးရဟာ မြန်မာစစ်အစိုးရကို နိုင်ငံတကာ မျက်နှာစာမှာ အပြင်းအထန် ခုခံကာကွယ်ပေးနေတဲ့ နိုင်ငံတခု ဖြစ်ပါတယ်။ လူ့အခွင့်အရေး ချိုးဖောက်တာတွေ၊ နိုင်ငံရေးအရ သဘောထား ကွဲလွဲသူတွေကို ထောင်သွင်း အကျဉ်းချထားတာတွေကြောင့် နိုင်ငံတကာက ၀ိုင်းပြီး ပြစ်တင်ရှုတ်ချနေတဲ့ မြန်မာစစ်အစိုးရကို တရုတ်တို့က အကာအကွယ် ပေးနေတာဟာ သူတို့ ကိုယ်ကျိုးစီးပွား သက်သက်အတွက်ဖြစ်ပြီး တရုတ်ရဲ့ အကာအကွယ် ပေးမှုကြောင့် မြန်မာစစ်အစိုးရဟာ ကိုယ့်လူထုအပေါ်ကို ဖိနှိပ်အုပ်ချုပ်ခွင့် ပိုရနေတယ်လို့ လူ့အခွင့်အရေးနဲ့ ဒီမိုကရေစီရေး လှုပ်ရှားသူတွေက ဝေဖန်ပြောဆိုကြပါတယ်။

Find this article at:
http://www.voanews.com/burmese/news/china-investment-myanmar-116659899.html

Source Cartoon from http://www.news-eleven.com

ဖတ်ဖို့ ရှေ့တွင်ရှိသေးသည်-နှိပ်ပါ....

ပြန်ခေါက်ထားစေချင်သည် ...

Requesting to VOA

By Thet Su Naing
Tuesday, 22 ဖေဖော်ဝါရီ 2011



Find this article at:
http://www.voanews.com/burmese/news/blogger/burma_blogger_sumyatmon_voaburmese_voa-116190264.html

ဖတ်ဖို့ ရှေ့တွင်ရှိသေးသည်-နှိပ်ပါ....

ပြန်ခေါက်ထားစေချင်သည် ...

နယူးဇီလန်ငလျင် ၆၅ ယောက်ထက်မနည်း သေဆုံး

ငလျင်ဒဏ်ကြောင့် ပြိုကျပျက်စီးသွားသည့် အဆောက်အဦးတခု(ဖေဖော်ဝါရီ ၂၂၊ ၂၀၁၁)

နယူးဇီလန်ငလျင် ၆၅ ယောက်ထက်မနည်း သေဆုံး

By ဗွီအိုအေ (မြန်မာဌာန)
အင်္ဂါ, 22 ဖေဖော်ဝါရီ 2011

နယူးဇီလန်နိုင်ငံရဲ့ ဒုတိယအကြီးဆုံး ခရစ်စ်ချာ့ခ်ျ (Christchurch) မြို့မှာ ဒီကနေ့ မွန်းလွဲ ၁၂ နာရီ ၅၁ မိနစ် အချိန်မှာ ပြင်းအား ၆.၅ မဂ္ဂနီကျုရှိတဲ့ ငလျင်ကြီး လှုပ်ခတ်ခဲ့တာကြောင့် အနည်းဆုံး လူ ၆၅ ယောက် သေဆုံးပြီး လူတွေ ရာနဲ့ချီ ဒဏ်ရာတွေ ရသွားခဲ့ရတယ်လို့ မြို့တော် ၀ယ်လင်တန် (Wellington) ကနေ ခရစ်စ်ချာ့ခ်ျမြို့ကို ချက်ချင်း ရောက်ရှိလာတဲ့ ၀န်ကြီးချုပ် ဂျွန်ကီး (John Key) က ရုပ်သံလွှင့် ပြောကြားခဲ့ပြီးတော့ နယူးဇီလန်နိုင်ငံကို အမှောင်ထုကြီး ကျရောက်ခဲ့တဲ့နေ့ကို အားလုံးဟာ ကြုံတွေ့လိုက်ရပြီလို့လည်း ပြောဆိုသွားပါတယ်။

ဒီငလျင်ဟာ နယူးဇီလန်ရဲ့ တောင်ဘက်ကျွန်းပေါ်မှာ တည်ရှိတဲ့ ခရစ်စ်ချာ့ခ်ျမြို့နဲ့ ၃ မိုင်အကွာ မြေအောက် ၂ မိုင်ခွဲ အနက်ကနေ ဗဟိုပြု လှုပ်ရှားခဲ့တာ ဖြစ်တယ်လို့ အမေရိကန် ဘူမိဗေဒ တိုင်းထွာရေးဌာနက ပြောပါတယ်။

မနက်ပိုင်း ၅ နာရီမှာလည်း ငလျင်ငယ်တခု ဒီမြို့မှာပဲ လှုပ်ခတ်ခဲ့ပေမဲ့ အပျက်အစီး မရှိဘဲ လူအများအိပ်ချိန် ဖြစ်နေတာကြောင့် မသိသာခဲ့ပါဘူး။

လူဦးရေ ၄၀၀,၀၀၀ နီးပါးရှိတဲ့ ခရစ်စ်ချာ့ခ်ျမြို့က မြင့်မားတဲ့ အဆောက်အဦး တော်တော်များများ ပြိုကျခဲ့ပြီးတော့ အခုအခါမှာ အပျက်အစီးပုံတွေ အောက်မှာ ပိတ်မိနေသူတွေ အနည်းဆုံး ၂၀၀ ကျော် ရှိနေတယ်လို့လည်း မြို့တော်ဝန်က ပြောပါတယ်။

ပိတ်မိနေသူတွေကို နယးဇီလန် တပ်မတော်က စစ်သည်အင်အား ၃၅၀၊ ကယ်ဆယ်ရေးဝန်ထမ်း ၂၅၀ တို့နဲ့ အပူတပြင်း ကယ်ထုတ်နေကြတယ်လို့ ၀န်ကြီးချုပ် ဂျွန်ကီးက ပြောပါတယ်။

မီးသတ်တပ်ဖွဲ့ကလည်း ရဟတ်ယာဉ်တွေနဲ့ ငလျင်ကြောင့် ဖြစ်ပွားနေတဲ့ မီးလောင်မှုတွေကို ငြှိမ်းသတ်ပေးနေကြပါတယ်။

သေဆုံးရသူတွေထဲမှာ အဆောက်အဦးနှစ်လုံး ပြိုကျလာလို့ ပိပြားသွားတဲ့ ဘတ်စ်ကားပေါ်က ခရီးသည်တွေလည်း ပါဝင်တယ်လို့ ရဲတပ်ဖွဲ့က ပြောပါတယ်။

မနှစ်က စက်တင်ဘာလမှာလည်း ခရစ်စ်ချာ့ခ်ျမြို့မှာပဲ ပြင်းအား ၇.၁ မဂ္ဂနီကျုရှိတဲ့ ငလျင်ကြီး လှုပ်ခတ်ခဲ့ပေမဲ့ အသေအပျောက် မရှိခဲ့ပါဘူး။

ဒီကနေ့မှာ ငလျင်ကြီး လှုပ်ခတ်ခဲ့ပြီးတဲ့နောက် ပြင်းအား ၅ မဂ္ဂနီကျုရှိတဲ့ ငလျင် ၂ ခုလည်း လှုပ်ခတ်ခဲ့တာကြောင့် ပိုပြီး သတိရှိကြဖို့ အာဏာပိုင်တွေက မြို့နေလူထုကို သတိပေးထားပါတယ်။

Find this article at:
http://www.voanews.com/burmese/news/new-zealand-earth-quake-116648214.html

ဖတ်ဖို့ ရှေ့တွင်ရှိသေးသည်-နှိပ်ပါ....

ပြန်ခေါက်ထားစေချင်သည် ...

Breaking News

ဖတ်ဖို့ ရှေ့တွင်ရှိသေးသည်-နှိပ်ပါ....

ပြန်ခေါက်ထားစေချင်သည် ...

ပြည်ထောင်စုတိုင်းရင်းသားကျေးရွာက မောင်မယ်သစ်လွင် ကြိုဆိုပွဲ

ကရင်တက္ကသိုလ်ကျောင်းသူကျောင်းသားများ

ကြိုဆို နှုတ်ဆက်ပွဲ

လူထု ၁,၀၀၀ခန့် လာရောက်

နန်းဖော့ဂေ (ကေအိုင်စီ)
ဖေဖော်ဝါရီလ ၂၁ရက်

ကရင်တက္ကသိုလ် ကျောင်းသူကျောင်းသားများ မောင်မယ်သစ်လွင် ကြိုဆိုပွဲနှင့် ဂုဏ်ပြုနှုတ်ဆက်ပွဲ အခမ်းအနားကို ရန်ကုန်တိုင်း၊ သာကေတမြို့နယ်ရှိ ပြည်ထောင်စုတိုင်းရင်းသားကျေးရွာတွင် ယမန်နေ့က ပြုလုပ်ပြီးစီးခဲ့ရာ လူထုပရိဿတ်ပေါင်း ၁,၀၀၀ခန့် လာရောက်ခဲ့ကြသည်ဟု သိရသည်။

အဆိုပါ အခမ်းအနားကို တိုင်းရင်းသားကျေးရွာရှိ ပြည်ထောင်စုခမ်းမတွင် ကရင်တိုင်းရင်းသား စာပေနှင့် ယဉ်ကျေးမှုကော်မတီ (တက္ကသိုလ်များ/ရန်ကုန်)က အပိုင်းနှစ်ပိုင်းခွဲ၍ ဦးစီးကျင်းပခဲ့ခြင်းဖြစ်ပြီး ပထမပိုင်းတွင် ကရင်အမျိုးသားသီချင်းဖြင့် စတင်ဖွင့်လှစ်ကာ ကော်မတီအဖွဲ့ဝင်များက “အောဟူ့အောဟောင်”(စည်းလုံးညီညွှတ်စို့) သီချင်းဖြင့် ဖျော်ဖြေတင်ဆက်ခြင်း၊ တက်ရောက်လာသည့် ဆရာ၊ဆရာမများ၊ မောင်မယ်သစ်လွင်များအား မိတ်ဆက်ခြင်းနှင့် တက်ရောက်လာသူဧည့်ပရိဿတ်များကို ကျွေးမွေးဧည့်ခံခဲ့ကြသည်။

မွန်းလွဲပိုင်း ဒုတိယပိုင်းဖျော်ဖြေရေးအစီအစဉ်တွင် “နိုင်ငံသစ်ဆီ တို့လှမ်းချီ”(တိုင်းရင်းသားအက)၊ ပညာပေးပြဇာတ်တို တင်ဆက်ခြင်း၊ ကရင့်ရိုးရာ ပွဲတက်ဝတ်စုံများယှဉ်ပြိုင်ခြင်း၊ ပျားဖွတ်ပြိုင်ပွဲ၊ အောပွဲနှင့် ကရင့်ရိုးရာဒုံးအက၊ လက်ဝှေ့ပြိုင်ပွဲများ တင်ဆက်ခြင်းများအပြင် အလှမယ်၊ အလှမောင်(King, Queen) ရွေးချယ်ခြင်း၊ ခေတ်ပေါ်တေးဂီတ အစီအစဉ်၊ ဆုပေးပွဲ၊ ဂိမ်းကစားခြင်းနှင့် လက်ဆောင်ပစ္စည်းများ ဖလှယ်ခြင်းများကို ပြုလုပ်ခဲ့ကြသည်ဟု သိရသည်။

အခမ်းအနားသို့ တက္ကသိုလ်ကျောင်းများမှ ကရင်ကျောင်းဆရာ၊ ဆရာမများ၊ ကရင်အမျိုးသား နှစ်သစ်ကူး ပွဲတော်ကျင်းပရေး ဗဟိုကော်မတီဝင်အချို့နှင့် ကရင်ပြည်သူ့ပါတီမှဒေါက်တာစောစိုင်မွန်သာတို့ တက်ရောက်ခဲ့ကြသော်လည်း ရွေးကောက်ပွဲအပြီး လွှတ်တော်အစည်းအဝေးနှင့် တိုက်ဆိုင်နေသဖြင့် စစ်အစိုးရအာဏာပိုင် တစ်ဦးတယောက်မျှတက်ရောက်ခဲ့ခြင်းမရှိဟု သိရသည်။

အခမ်းအနားတက်ရောက်လာသည့် သူနာပြုတက္ကသိုလ်မှ ဆရာမကြီးနော်ထီးလာက နောက်ဆုံးနှစ် ဘွဲ့ယူတော့မည့် ကရင်ကျောင်းသူကျောင်းသားများ မိမိတို့သင်ယူလေ့လာခဲ့သည့် ပညာရပ်ဖြင့် ရောက်ရှိရာဒေသတွင် အသက်မွေးဝမ်းကျောင်းပြုရင်း မိမိတို့၏ရိုးရာအမွေအနှစ်များကို ဖော်ထုတ်ထိန်း
သိမ်းမြှင့်တင်ရန်၊ တက္ကသိုလ်ပညာတက်ရောက်သင်ကြားမည့် ကရင်တိုင်းရင်းသားမောင်မယ်များအနေဖြင့် စာရိတ္တကောင်းမွန်စွာနှင့် ပညာကိုဆုံးခန်းတိုင် တက်ရောက်သင်ယူသွားကြရန် လက်တွဲ ဆောင်ရွက်သွား
ကြရမည်ဖြစ်ကြောင်း နှုတ်ခွန်းဆက်အမှာစကား ပြောကြားသွားခဲ့သည်။

ကရင်အမျိုးသား နှစ်သစ်ကူးပွဲတော်ကျင်းပရေးဗဟိုကော်မတီ အထွေထွေအတွင်းရေးမှူး စောလှထွန်းက “အခုလို ကရင်ကျောင်းသူကျောင်းသားတွေရဲ့ Fresher welcome နဲ့ Farewell ကို တိုင်းရင်းသား စာပေနဲ့ ယဉ်ကျေးမှုကော်မတီက နှစ်စဉ်နှစ်တိုင်း ကျင်းပနိုင်တာကိုဂုဏ်ယူဝမ်းမြောက်မိပါတယ်။ ဒါပေမဲ့ အရင်ကလို စုပေါင်းလေ့လာရေးထွက်တာ၊ မဂ္ဂဇင်းထုတ်ဝေတာတွေ မပြုလုပ်နိုင်တာကိုတွေ့ရတော့ အားနည်းချက်
တခုလို့ မြင်မိတယ်။ တဖက်မှာအားကောင်းတာက အခုလိုကျောင်းဝင်းကွန်ပေါင်းထဲမှာ မဟုတ်ဘဲ တိုင်းရင်းသားကျေးရွာမှာလုပ်တော့ လူမှုရေးအဖွဲ့အစည်းတွေရဲ့ ပါဝင်ဆင်နွဲလာမှုက ပိုအားကောင်းလာ တယ်လေ။ လူငယ်တွေအနေနဲ့ နည်းပညာတွေတိုးတက်နေတဲ့ခေတ်မှာ ကိုယ့်ရဲ့စွမ်းရည်ကို မြှင့်တင်ဖို့တော့
လိုတယ်။”ဟု ပြောသည်။

ဆက်လက်၍ ကရင်တိုင်းရင်းသား စာပေနှင့် ယဉ်ကျေးမှု ကော်မတီ၏ လုပ်ငန်းဆောင်ရွက်မှုများကို ကရင်အမျိုးသား နှစ်သစ်ကူးပွဲတော်ကျင်းပရေးဗဟိုကော်မတီ တွဲဘက်အတွင်းရေးမှူး မန်းကျော်ညွှန့် ကလည်းကောင်း၊ ကျောင်းသူကျောင်းသားများကိုယ်စား ရန်ကုန်နည်းပညာတက္ကသိုလ်မှ ပထမနှစ်ကျောင်း
သား စောသိန်းအောင်စံနှင့် ရန်ကုန်သူနာပြုတက္ကသိုလ် နောက်ဆုံးနှစ်ကျောင်းသူ နန်းနှင်းနုရည်ထွန်းက ကျေးဇူးတင်စကားများ ပြောကြားခဲ့ကြသည်။

ယခုနှစ် မောင်မယ်သစ်လွင်ကြိုဆိုပွဲနှင့် နှုတ်ဆက်ဂုဏ်ပြုအခမ်းအနားသို့ ရန်ကုန်အရှေ့ပိုင်းတက္ကသိုလ်၊ စီးပွားရေးတက္ကသိုလ်၊ နည်းပညာတက္ကသိုလ်၊ နယ်စပ်ဒေသနှင့် တိုင်းရင်းသားလူမျိုးများဖွံ့ဖြိုးရေး ဒီဂရီ ကောလိပ်မှ ကျောင်းသူကျောင်းသားများအပြင် ဖားအံနှင့် မော်လမြိုင်တက္ကသိုလ်မှ ကျောင်းသူကျောင်းသား အချို့လည်း လေ့လာသူများအဖြစ် တက်ရောက်ခဲ့ကြသည်။

“ကရင်အချင်းချင်းတွေ့ဆုံပြီး ရင်းနှီးမှုရှိကြမှစည်းလုံးကြမှာ။ ဒါပေမယ့် အခုကရင်လူငယ်တွေ ကရင်စကား မတတ်ကြဘူး။ မိတ်ဆက်တာတောင် ဗမာလိုမိတ်ဆက်ကြတယ်။ အဲဒါတော့ဝမ်းနည်းစရာပဲ။ တကယ်ဆို ဒီလိုပွဲမှာ ကရင်ရိုးရာယဉ်ကျေးမှုကိုပဲ ဖော်ထုတ်စေချင်တယ်။ အားလုံးကို ကရင်စကားပြောစေချင်တယ်။”
ဟု ရန်ကုန်အရှေ့ပိုင်းတက္ကသိုလ်မှ ရူပဗေဒဘာသာဖြင့်အောင်မြင်ခဲ့သူ စောဟန်ဖြိုးလင်း က ကေအိုင်စီကို ပြောသည်။

ယခင်က အဆိုပါ အခမ်းအနားမျိုးကို ရန်ကုန်မြို့တွင်းရှိ တက္ကသိုလ်ကျောင်းဝင်းများ၌သာ နှစ်စဉ် ကျင်းပပြုလုပ်လေ့ရှိသော်လည်း ပြီးခဲ့သည့် ၅နှစ်ခန့်ကတည်းက ပြည်ထောင်စုတိုင်းရင်းသားကျေးရွာသို့ ရွှေ့ပြောင်းပြုလုပ်လာခဲ့ကြသည်။

၁၉၆၄ခုနှစ်နောက်ပိုင်းတွင် ကရင်ကျောင်းသားကျောင်းသူများအသင်းကို ကရင်တိုင်းရင်းသား စာပေနှင့် ယဉ်ကျေးမှုကော်မတီအဖြစ် တော်လှန်ရေးကောင်စီအစိုးရက အစားထိုးပြောင်းလဲဖွဲ့စည်းခဲ့ပြီးနောက်ပိုင်း စာစောင်၊ မဂ္ဂဇင်း ရေးသားထုတ်ဝေမှုများကို လုပ်ဆောင်နိုင်ခဲ့သေးသော်လည်း ယခုအချိန်တွင် တက္ကသိုလ်ကျောင်းသားများ ကြိုဆိုနှုတ်ဆက်ပွဲတစ်ခုတည်းကိုသာ လုပ်ဆောင်နိုင်ခြင်းဖြစ်သည်။

နန်းဖော့ဂေ
(ကေအိုင်စီ)

ဖတ်ဖို့ ရှေ့တွင်ရှိသေးသည်-နှိပ်ပါ....

ပြန်ခေါက်ထားစေချင်သည် ...

ငါးသိန်းတန် GSM ဖုန်းများ ငှားရမ်း ချပေးလျက် ရှိ

ငါးသိန်းတန် GSM ဖုန်းများ ငှားရမ်း ချပေးလျက်ရှိ

Monday, 21 February 2011
အကျိုးဆောင်ဂျာနယ်

ကျပ် ငါးသိန်းတန် GSM ဖုန်းများကို ဖေဖော်ဝါရီ ၁၄ ရက်နေ့ မှစတင်၍ ရန်ကုန်မြို့နှင့် မန္တလေး မြို့များတွင် တစ်ပြိုင် တည်း ငှားရမ်း ချပေးလျက် ရှိကြောင်း သိရှိရပါ သည်။ အဆိုပါ ဖုန်းများ၏ ဂဏန်း နံပါတ် အစမှာ ၀၉-၄၁ နှင့် ၀၉- ၄၃ တို့ဖြစ်ပြီး စုစုပေါင်း ဂဏန်း ရှစ်လုံးပါ ဖုန်းများဖြစ်ပါသည်။ ယခု ငှားရမ်းချထားပေးသည် GSM ဖုန်းများတွင် ကြိုတင်ငွေ ဖြည့်ကတ်များ အသုံးပြုရမည်ဖြစ်ပြီး ယင်းကတ် များကို ရတနာပုံ ဆိုက်ဘာစီးတီးမှ ထုတ်လုပ်ပေးလျက် ရှိပါသည်။

ယင်းကြိုတင် ငွေဖြည့်ကတ်များကို မြန်မာ့ဆက်သွယ်ရေးမှ ထုထ်လုပ်ဖြန့်ချိ ရောင်းချခွင့် ပေးထားသော Elite Teth ကုမ္ပဏီနှင့် Asia Mega Link ကုမ္ပဏီတို့မှ ကျပ် တစ်သောင်းတန်၊ ကျပ်နှစ်သောင်းတန်နှင့် ကျပ်သုံး သောင်းတန် ကတ်များ ရောင်းချပေးလျက် ရှိပါသည်။ ဖုန်းပြောဆို ဆက်သွယ်ခ အနေဖြင့် တစ်မိနစ်လျှင် ၅၀ိ/-၊ Message ပို့ခ တစ်စောင် ၂၅၀ိ/- သတ်မှတ် ထားပါသည်။

ယခုငှားရမ်းချ ထားပေးသည့် ကျပ် ငါးသိန်းတန် GSM ဖုန်းများသည် အင်တာနက်ပါ သုံးစွဲနိုင်ပြီး အင်တာနက်သုံးစွဲခ တစ်မိနစ်လျှင် လေးကျပ်နှုန်း သတ်မှတ်ထားပါသည်။ အဆိုပါ ကျပ်ငါးသိန်းတန် GSM ဖုန်းများကို ငှားရမ်းသုံးစွဲလိုသူ များအနေဖြင့် အိမ်ထောင်စုဇယား မိတ္တူ၊ မှတ်ပုံတင်မူရင်းနှင့် မိတ္တူ၊ လျှောက်ထားသူ၏ လိုင်စင်ဓာတ်ပုံ နှစ်ပုံနှင့်အတူ ရန်ကုန်တိုင်း ဒေသကြီးအတွင်း ရွှေဂုံတိုင် မြန်မာ့ဆက်သွယ်ရေးလုပ်ငန်း ရုံးနှင့်မန္တလေးတိုင်း ဒေသကြီးအတွင်း ၂၆ လမ်း နှင့် လမ်း ၈၀ ထောင့်၊ အောင်မြေသာစံ မြို့နယ်ရှိ ဆက်သွယ်ရေးလုပ် ငန်းရုံးတို့တွင် လျှောက်ထားနိုင်ကြောင်း သိရှိရသည်။

ပုလဲနက်
အကျိုးဆောင်ဂျာနယ်

ဖတ်ဖို့ ရှေ့တွင်ရှိသေးသည်-နှိပ်ပါ....

ပြန်ခေါက်ထားစေချင်သည် ...

၁၅ မိနစ်လွှတ်တော်

စာရင်းစစ်ချုပ်ဟောင်း၊ ဗိုလ်ချုပ်ဟောင်း ဦးလွန်းမောင်

Source Photo from http://www.google.com/images

၂၀၁၁-၁၂ အတွက် ရသုံးငွေဆိုင်ရာ ဥပဒေ ပြဋ္ဌာန်း

By ကျော်ကျော်သိန်း
တနင်္လာ, 21 ဖေဖော်ဝါရီ 2011

လက်ရှိ တိုင်းပြည်ကို အုပ်ချုပ်နေတဲ့ နိုင်ငံတော် အေးချမ်းသာယာရေးနဲ့ ဖွံ့ဖြိုးရေး ကောင်စီကနေ ၂၀၁၁-၂၀၁၂ ဘဏ္ဍာရေးနှစ်အတွက် နိုင်ငံတော် ရသုံးငွေဆိုင်ရာ ဥပဒေကို ပြဋ္ဌာန်းကြောင်း ထုတ်ပြန် ကြေညာခဲ့ပါတယ်။ ဒီဥပဒေကို ဇန်န၀ါရီလ ၂၇ ရက်နေ့ကတည်းက ပြဋ္ဌာန်းခဲ့တာကြောင့် လွှတ်တော်အစည်းအဝေးတွေ မစခင်၊ အခြေခံဥပဒေ တရားဝင် အာဏာမတည်ခင်မှာ ပြဋ္ဌာန်းလိုက်တာ ဖြစ်ပါတယ်။ ဒါ့အပြင် အများပြည်သူ သိရှိအောင် ကျယ်ကျယ်ပြန့်ပြန့် ကြေညာတာလည်း မရှိခဲ့ပါဘူး။ ဒါနဲ့ပတ်သက်ပြီး ဘန်ကောက်နေ အသေးစိတ် စုံစမ်းထားတဲ့ ကိုကျော်ကျော်သိန်းက တင်ပြပေးထားပါတယ်။

လာမယ့် ဧပြီလ ၁ ရက်နေ့ကျရင် စတင်မယ့် ဘဏ္ဍာရေးနှစ် အသစ်အတွက် နိုင်ငံတော် ရသုံးငွေဆိုင်ရာ ဥပဒေကို ဇန်န၀ါရီလ ၂၇ ရက်နေ့မှာ စစ်ကောင်စီက ပြဋ္ဌာန်းခဲ့တဲ့အကြောင်း နိုင်ငံပိုင် သတင်းမီဒီယာတွေကနေ ကြေညာခဲ့တာ မဟုတ်ပါဘူး။ ဒီကြေညာချက်ပါတဲ့ ဂျာနယ်တစောင်ကတော့ ဖေဖော်ဝါရီလ ၂၁ ရက် နေ့စွဲနဲ့ ထုတ်ဝေတဲ့ ဖေးဗရိတ်ဆိုတဲ့ဂျာနယ် ဖြစ်ပါတယ်။ အဲဒီဂျာနယ် စာမျက်နှာ ၃ မှာပါတဲ့ ကြေညာချက် တစိတ်တပိုင်းကို ကိုယ်တိုင် ဖတ်ပြခဲ့တာကတော့ အမျိုးသား ဒီမိုကရေစီ အင်အားစု (NDF) ပါတီ ခေါင်းဆောင်တဦးဖြစ်သူ ဦးခင်မောင်ဆွေ ဖြစ်ပါတယ်။

“နိုင်ငံတော် အေးချမ်းသာယာရေးနှင့် ဖွံ့ဖြိုးရေး ကောင်စီသည် ပြည်ထောင်စုသမ္မတ မြန်မာနိုင်ငံတော် ဖွဲ့စည်းပုံ အခြေခံဥပဒေအရ ပြည်ထောင်စု အစိုးရအဖွဲ့နှင့် တိုင်းဒေသကြီး၊ ပြည်နယ်အစိုးရ အဖွဲ့များက ဘဏ္ဍာငွေ အရ၊ အသုံးဆိုင်ရာ ကိစ္စရပ်များကို အဆင်ပြေ ချောမွေ့စွာ အကောင်အထည်ဖော် ဆောင်ရွက်နိုင်ရန် အလို့ငှာ ပြည်ထောင်စု သမ္မတ မြန်မာနိုင်ငံတော် ဖွဲ့စည်းပုံ အခြေခံဥပဒေ ပုဒ်မ ၄၄၃ နှင့်အညီ ဤဥပဒေကို ပြဋ္ဌာန်းလိုက်သည်။ ဒီလောက်ပဲ ပါတယ်ဗျ။”

ဖေးဗရိတ်ဂျာနယ်အပြင် ကျန်တဲ့ ပြည်တွင်းထုတ် ဘယ်ဂျာနယ်တွေမှာ ပါသေးတယ် ဆိုတာကိုတော့ တိတိကျကျ မသိရပါဘူး။

နိုင်ငံတခုမှာ အရေးကြီးလှတဲ့ နိုင်ငံတော် ဘဏ္ဍာငွေတွေကို ဘယ်လိုခွဲဝေ သုံးစွဲနေတယ်ဆိုတာ အခွန်ထမ်းလူထု သိအောင် အတိအကျ ထုတ်ပြန်ကြေညာ မပေးခဲ့တာ ၁၉၈၈ ခုနှစ်၊ စက်တင်ဘာလ ၁၈ ရက်နေ့ စစ်တပ်က အာဏာသိမ်းပြီး နောက်ပိုင်း ကာလကတည်းကလို့ ဆိုရမှာပါ။ အခု ဥပဒေပြဋ္ဌာန်းတာကတော့ သာမန်လူထု မဆိုထားနဲ့၊ မကြာသေးခင်ကမှ လူထုက ရွေးကောက် တင်မြှောက်လိုက်ပြီး အခုအခါမှာ လွှတ်တော်အစည်းအဝေးတွေ တက်ရောက်နေကြတဲ့၊ တိုင်းပြည်ရဲ့ ဥပဒေ အသီးသီးကို ပြဋ္ဌာန်းဖို့ အဓိက တာဝန်ရှိတဲ့ လွှတ်တော်ကိုယ်စားလှယ်တွေတောင်မှ မသိကြပါဘူး။

လွှတ်တော်ကိုယ်စားလှယ်တွေ အနေနဲ့ အခြေခံဥပဒေကို လိုက်နာစောင့်ထိန်းပါ့မယ်လို့ ကတိသစ္စာ ပြုထားရတဲ့အတွက် အခြေခံဥပဒေအရ လုပ်ဆောင်တဲ့ အခုလို ကိစ္စမျိုးမှာ ဘာမှ ဝေဖန်ထောက်ပြခွင့် မရှိပါဘူးလို့ လွှတ်တော်အစည်းအဝေးတွေ တက်နေတဲ့ သင်္ဃန်းကျွန်းမြို့နယ်က ပြည်သူ့လွှတ်တော် ကိုယ်စားလှယ် ဦးသိန်းညွန့်က ပြောပါတယ်။

“အခြေခံဥပဒေက ဒီလို အခွင့်အလမ်းတွေကို ပေးထားတယ်ဆိုတဲ့ အချိန်မှာတော့ ကျနော်တို့က အခြေခံဥပဒေ အတိုင်းပဲ ပြောရ၊ ဆိုရတော့မှာကိုး။ နောင် Back Date တွေကျတော့ ဒီအခြေခံဥပဒေအရ မကိုက်ညီဘူး၊ မဆောင်ရွက်ဘူး ဆိုရင်လည်း ကျနော်တို့က ဝေဖန်ဆွေးနွေး ထောက်ပြရတော့မှာကိုး။ အခုအချိန်ကတော့ သူ့ရဲ့ ဖွဲ့စည်းပုံ အခြေခံဥပဒေမှာ ပေးထားတဲ့ လုပ်ပိုင်ခွင့်အတိုင်း ဆောင်ရွက်နေသမျှကတော့ ကျနော်တို့က လွှတ်တော်အပေါ် မတင်လာတဲ့ အပေါ်မှာ ကျနော်တို့ကတော့ ပြောလို့ဆိုလို့ မရသေးဘူးလေ။”

လူထုက ရွေးကောက်တင်မြှောက်လိုက်တဲ့ လွှတ်တော်ကိုယ်စားလှယ်တွေ၊ သမ္မတတွေ၊ ၀န်ကြီးချုပ်တွေနဲ့ စနစ်တကျ အုပ်ချုပ်တဲ့ တိုင်းပြည်တွေမှာ နိုင်ငံတော် ဘဏ္ဍာငွေကို ဘယ်လို ခွဲဝေသုံးစွဲမယ် ဆိုတာ ပြဋ္ဌာန်းတော့မယ်ဆိုရင် လူထုသိအောင် ထုတ်ပြန် ကြေညာပေးသလို လွှတ်တော်ထဲမှာ အချေအတင် ဆွေးနွေးပြီး သင့်တော်၏၊ မသင့်တော်၏ စဉ်းစားဆုံးဖြတ်ကြ၊ သတင်းမီဒီယာတွေကနေ ထောက်ပြ ဝေဖန် ရေးသားကြပြီးတော့ ပွင့်လင်းမြင်သာအောင် လုပ်ကြပါတယ်။

အခု မြန်မာနိုင်ငံမှာ နိုင်ငံတော် ရသုံးငွေဆိုင်ရာ ဥပဒေ ပြဋ္ဌာန်းတာကကျတော့ လွှတ်တော်အစည်းအဝေးတွေ မစခင်လေးမှာကိုပဲ ကပ်ပြီး ပြဋ္ဌာန်းလိုက်တာပါ။

ဒီလိုဥပဒေမျိုးကို လွှတ်တော်ကနေ ပြဋ္ဌာန်းတာကသာ သင့်လျော်ပါတယ်လို့ သုံးသပ်သူက ဗဟု ဖွံ့ဖြိုးမှုအဖွဲ့က ဦးအောင်သူငြိမ်း ဖြစ်ပါတယ်။

“ဘတ်ဂျက်ဥပဒေနဲ့ ပတ်သက်လို့ သူ့အတွင်းမှာ ဘာတွေ ဖော်ပြထားလဲဆိုတာ တိတိကျကျ မတွေ့ရသေးတော့ သုံးသပ်ဖို့တော့ ခက်ပါတယ်။ ဒါပေမဲ့လည်း အခုလုပ်ငန်းစဉ်ကို ပြန်ကြည့်မယ်ဆိုရင် တော်တော်ကို လုပ်ထုံးလုပ်နည်း မကျတဲ့ အနေအထားတွေ တွေ့ရပါတယ်။ ကျနော်ဆိုလိုတာက လွှတ်တော်ကြီး ရှိလျက်သားနဲ့၊ လွှတ်တော်က တိုင်းပြည်မှာ ဥပဒေပြုတဲ့ အနေအထားမှာ အမြင့်ဆုံး အာဏာပိုင် အဖွဲ့အစည်း ဖြစ်သင့်တာ။ ဒါကို ကြိုပြီးတော့ ဆုံးဖြတ်ထားတဲ့ ပုံစံမျိုး ဖြစ်နေတယ်။ ဒီဥပဒေကို ချထားတာကလည်း အခုလက်ရှိ လွှတ်တော်တက်နေတဲ့ ကိုယ်စားလှယ်တွေတောင် သိရဲ့လားဆိုတဲ့ မေးခွန်းဖြစ်ပါတယ်။

“နောက်တခုက ဒီနေ့ လွှတ်တော် ကျင်းပနေတဲ့ပုံက တရက်ကို ၁၅ မိနစ်လောက်ပဲ ကျင်းပနေတဲ့ အခါကျတော့ လူတွေကလည်း အခု ၁၅ မိနစ်လွှတ်တော်လို့ ပြောနေတဲ့ အနေအထား ဖြစ်လာတယ်။ တကယ်ပြောကြေးဆိုရင် ၁၅ မိနစ် မဟုတ်ဘဲ ပိုနေတဲ့ အချိန်တွေမှာ လွှတ်တော်မှာ ဘတ်ဂျက်နဲ့ ပတ်သက်တဲ့ အသေအချာကို စနစ်တကျ လေ့လာ သုံးသပ်မယ့် ကော်မတီမျိုးတရပ် ဖွဲ့ပြီးတော့ မူကြမ်း တင်သွင်းပြီးတော့ ဒါကို အတည်ပြုခိုင်းတယ်ဆိုရင် ပိုပြီးတော့ သင့်လျော်ပါတယ်။”

ဒီအတောအတွင်းမှာပဲ ဒီကနေ့ ဆက်ပြီးကျင်းပတဲ့ ပြည်ထောင်စုလွှတ်တော် အစည်းအဝေးကနေ သောကြာနေ့က အမည်စာရင်း တင်သွင်းထားတဲ့ ဒေါက်တာထွန်းရှင်ကို ပြည်ထောင်စု ရှေ့နေချုပ်အဖြစ် ကန့်ကွက်သူမရှိ အတည်ပြုပေးခဲ့ပါတယ်။ ဒါ့အပြင် စာရင်းစစ်ချုပ်ဟောင်း၊ ဗိုလ်ချုပ်ဟောင်း ဦးလွန်းမောင်ကို ပြည်ထောင်စု စာရင်းစစ်ချုပ်အဖြစ် ရွေးကောက်ခံ သမ္မတက အမည်စာရင်း တင်သွင်းခဲ့ပြီးတော့ မနက်ဖြန် အစည်းအဝေးမှာ အတည်ပြုရေး ဆုံးဖြတ်မှာ ဖြစ်ပါတယ်။

Find this article at:
http://www.voanews.com/burmese/news/spdc-budget-law-116590963.html

ဖတ်ဖို့ ရှေ့တွင်ရှိသေးသည်-နှိပ်ပါ....

ပြန်ခေါက်ထားစေချင်သည် ...