ပန်းဆန္ဒ

ပန်းဆန္ဒ
မင်းစိုးစံ
အဝေးရောက် ကရင်ဒုက္ခသည်တဦး

စိုပြေလန်းဆန်းတဲ့
ပန်းရင်ပြင်မှာ
အရောင်အသွေးစုံလင်ပြီး
မွှေးယနံ့ခြင်းယှဉ်ပြိုင်ရင်း
ပန်းတွေဝေလှိုင်လို့
အပွင့်ချင်းဆိုင်နေကြတယ်။

ဖူးငုံဖွေးလွ
နုရွအိစက်
လှပတဲ့ပန်း ရ,ချင်ရင်
စေတနာရှင်
ပညာတတ်ပန်းစိုက်သမားကို
နေရာပေးထားဘို့လိုတာပေါ့။

ခက်တာက
ပန်းမစိုက်တတ်တဲ့လူတွေက
ပန်းခင်းကို အရ,လုယူ
ပန်းစိုက်သမားကိုဘေးချိတ်
ဖိနှိပ်လို့ချိုးနှိမ်ထား
ဘေးရောက်သွားအောင်လုပ်
ပန်းတွေကိုခုတ်ရောင်း
အဆီပျံပြည့်ဖေါင်းတဲ့မျက်နှာနဲ့
ဆရာကြီးလုပ်
ကိုယ်ကျိုးအတွက်အမြတ်ထုတ်နေကြတယ်။

ဒီထက်မက
ပန်းဘဝရပ်တည်စေရေး
ရေလောင်းပေါင်းသင်
အပင်ရှင်အောင်မလုပ်လေတော့
ရောင်စုံပန်းတွေညှိုးလျ
ပန်းတွေရဲ့ဘဝ
ပျက်ကြရပြီ။

ယနံ့ထုံမွှေးကြိုင်သင်း
လှပ,တဲ့ပန်းခင်းဖြစ်ဖို့အတွက်
ပန်းမစိုက်တတ်တဲ့လူတွေ
ငတေကြီးလုပ်နေမယ့်အစား
ပန်းစိုက်သမားရဲ့နေရာ
ပြန်ပေးလိုက်စမ်းဗျာ။

မင်းစိုးစံ
အဝေးရောက် ကရင်ဒုက္ခသည်တဦး

အဝေးရောက် ကရင်ဒုက္ခသည်များ လူမှုစောင့်ရှောက်ရေးအသင်း မှ ထုတ်ဝေသည်။
အတွဲ(၁) အမှတ်(၁)
၁၉၉၉ခုနိုဝင်္ဘာလ