ဂရမ်မာ မမှားခဲ့ပါ

ဂရမ်မာ မမှားခဲ့ပါ
အပိုင်း(၂)
မောင်ရင့်မာ (ကျောင်းကုန်း)

ငါတို့ဘက်တွင် “အမှန် တရား၏ မိခင်” တရား မျှတမှု ရှိသည်။
မည်သို့ပင်ဖြစ်စေ လူ (၁၂) ယောက်၊ သေနတ် (၁၂)လက်ဖြင့် ပြန်လည် စတင်ခဲ့ရသော ကျူးဘား တော်လှန်ရေးသည် ကြောက်ခမန်းလိလိ အောင်မြင်မှုရခဲ့သည်။ ကျူးဘား ပြည်သူတို့က လည်း ကတ်စထရို အပေါ် ယုံကြည် ကိုးစားမှုဖြင့် တစ်ခဲနက် ထောက်ခံ အားပေးခဲ့သည်။ ဘာ တစ္စတာသည် ကျူးဘားမှ ဒရောသောပါး ထွက်ပြေး သွားခဲ့သည်။

ထိုစဉ်က သူသည် ပျိုမျစ် ငယ်ရွယ်သမျှ ဖြူစင် ဖြောင့်မတ်ခဲ့သူ ဖြစ်သည်။ ရဲဝံ့ စွန့်စားသမျှ စွန့်လွှတ် အနစ်နာ ခံခဲ့သူ ဖြစ်သည်။ ကျူးဘား လွတ် မြောက်ရေးနှင့် ဒီမိုကရေစီရေး အပြင် အမျိုးသားတိုင်း လူတန်းစေ့ နေနိုင်ရေး အတွက် တစ်ချောင်းတည်းသော စိတ်ဖြင့် ဦးလည်မသုန်ဆောင် ရွက် ခဲ့သူဖြစ်သည်။ တော်လှန်သော ခေါင်းဆောင် ဒေါက်တာဖီ အယ်လ် ကတ်စထရိုသည် ၁၉၅၉ ခုနှစ်၊ ဖေဖော်ဝါရီလ ၁၆ ရက်နေ့တွင် ၀န်ကြီးချုပ် ဖြစ်လာခဲ့သည်။ ရဲဘော် ဒေါက်တာ အာနက်စတိုချေ ဂွေဗားရားသည် စက်မှုလုပ်ငန်း ၀န်ကြီး ဖြစ်လာခဲ့သည်။ (ခုနစ်နှစ် အကြာတွင်မှ ဂွေဗားရားသည် လျှို့ဝှက်စွာ ဘိုလီးဗီးယားတော တွင်းတစ်နေရာသို့ ထွက်ခွာ သွားခဲ့ခြင်းဖြစ်သည်။) ရွက်လှေကလေး “ဂရန်မာ” ဂုဏ် ယူလောက်ပါပေသည်။


“အို . . . ဂရန်မာ ငဲ့
သင့်တာဝန်ကျေမှု
ထာဝစဉ် အလေးပြု လိုက်ပါရဲ့”
_ _ _
ကတ်စထရို၏ အစိုးရ အဖွဲ့သည် စီးပွားရေးနှင့် လူမှုရေး ပြောင်းလဲမှု အစီအစဉ်ကို စတင်ခဲ့သည်။ ဆန့်ကျင်သူတို့အား ထောင်သွင်း အကျဉ်း ချခြင်း၊ ကွပ်မျက်ခြင်း ပြုခဲ့သည်။ ကျူးဘား လူမျိုး ခုနစ်သောင်းကျော်ခန့် အမေရိကန်သို့ ထွက်ပြေး ခိုလှုံ သွားခဲ့သည်။ မွေးမြူရေး၊ ဆေးရွက်ကြီး စိုက် ခင်း၊ဘဏ်နှင့် ကုမ္ပဏီ အားလုံးကို လျော်ကြေး မပေးဘဲ ပြည်သူပိုင် သိမ်းပစ်လိုက်သည်။ ကြံအထွက် ကျဆင်းခဲ့သည်။ အခြားသော ကွန်မြူနစ် နိုင်ငံတို့၏ အထောက်အပံ့ကို မှီခို ရပ်တည်ရသောကြောင့် ၁၉၈၀ ခုနှစ်နှောင်းပိုင်း ကွန်မြူနစ် အုပ်စု ပြိုလဲသွားသော အခါ ကျူးဘား စီးပွားရေး ဆိုး ရွားယိုင်နဲ့ လာခဲ့သည်။ အမေရိကန်က အရေးယူ ပိတ်ဆို့မှုများ ပိုမို တင်းကြပ်လိုက်ရာ အခြေအနေ ပို၍ ဆိုးရွား သွားခဲ့သည်။ ၁၉၄၄ ခုနှစ်၊ အစိုးရ ဆန့်ကျင် ဆန္ဒပြပွဲများကြောင့် ကတ်စထရိုသည် နိုင်ငံ အတွင်းမှ ထွက်ခွာခွင့် ကန့်သတ်ချက် များကို လျှော့ချ ပေးလိုက်ရသည်။

လူသုံးသောင်းကျော် ကျူးဘားမှ ထွက်ပြေးသွားခဲ့ပြီး ဂွာတာနာ မိုစစ် အခြေစိုက် စခန်းမှ ဒုက္ခသည် နှစ်သောင်းကို ကျူးဘားသို့ ပြန်ပို့ ပေးခဲ့ရသည်။ ဗီဒီယို တိပ်ခွေကို ပြောင်းပြန် ရစ်လိုက်သလိုပဲ ဖြစ်သည်။

“သင့်ခရီးစဉ်ရဲ့ အကြောင်းဆက်လာ
၁၉၈၀ ခုနှစ်မှာတော့
ဖလော်ရီဒါမှာ ကမ်းကပ်သွားကြ
လှေကလေးတွေ အစင်းများစွာ
ကျူးဘားခရီးသည် စုစုပေါင်း
တစ်သောင်းနှစ်ထောင့် ငါးရာကျော်ပါသတဲ့။
ရာစုတစ်ဝက်ကျော်လာ
ခုနေခါ ငါမေးချင်ရဲ့
သင်ကျောပိုးခဲ့ သူတွေ အတွက်
ဂုဏ်ယူလျက် နေနိုင်ပါ သေးရဲ့လား
ဂရန်မာ”
“မိုးသစ်ဝေ”၏ ကဗျာ လေးကို ဖတ်ပြီးရင်ထဲ ဆွတ်ကျင်သွားခဲ့သည်။ ဂုဏ်ယူ နိုင်ပါသေးရဲ့လား ဆိုသော မေးခွန်းက ပဲ့တင်မြည်ဟိန်း နေခဲ့သည်။
_ _ _
တစ်ခါက ပန်းချီကျော် ဆရာ တစ်ဦးသည် အပြစ် ကင်းစင်သော သူငယ်တော်နှင့် စေတန် နတ်ဆိုးတို့ ပါဝင်သည့် ပုံကားချပ်ကို ရေးဆွဲ သရုပ်ဖော်ဖို့ တာဝန်ကျ ရောက်ခဲ့သည်။ သူငယ်တော်ကဲ့သို့ အပြစ် ကင်းစင်သော သူငယ်လေး တစ်ဦးကို ရှာဖွေ တွေ့ရှိခဲ့ရာ ပုံကား ချပ်ကို စတင် ရေးဆွဲခဲ့သည်။ သို့ရာတွင် မကောင်းမှုကို ကိုယ်စားပြုမည့် စေတန်၏ ပုံကို ရေးဆွဲဖို့ နှစ်ကာလများစွာ ရှာဖွေခဲ့သော်လည်း မတွေ့နိုင်ဘဲ ရှိခဲ့သည်။ တစ်နေ့သော အခါ သေရည် ဆိုင်ထဲသို့ စုတ်ပြတ်နံ စော်၍ နိမ့်ပါးသော ရုပ်လက္ခဏာ ရှိသူတစ်ဦး ၀င်ရောက် လာခဲ့ရာ ပန်းချီကျော်က စေတန်၏ ပုံအတွက် ကိုယ်ဟန်ပြ ပေးရန် တောင်းပန်ခဲ့သည်။ ထိုသူကလည်း သဘောတူခဲ့သည်။ ကျွမ်းကျင် ပြောင်မြောက်သော စုတ်ချက်များဖြင့် ၀င်စား ရေးဆွဲနေသော ပန်းချီကျော်အား ထိုသူက ပြောလိုက်သည်။
“ကျွန်တော်ဟာ ဟိုနှစ်ပေါင်း များစွာကလည်း ဆရာကြီးရဲ့ ပန်းချီကားမှာ သူငယ်တော် အဖြစ် ပါဝင်ဖူးသေးတယ်”
_ _ _
“ဂရန်မာ”တဲ့
ကျွန်တော်သည် မိုးသစ်ဝေ၏ ကဗျာကို ဖတ်မိ သွားခဲ့ရာမှ စေတန်မဟုတ်သော ရွက်လှေပြာလေး တစ်စင်းကိုလည်း သတိရမိသွားခဲ့ခြင်းပဲ ဖြစ်လေသည်။
မောင်ရင့်မာ(ကျောင်းကုန်း)
ပြီး၏

ဖတ်ရှုခြင်း
-မိုးသစ်ဝေ(ဂရန်မာ)(၉/၂၀၀၉၊ စတိုင်သစ်)
- လင်းယုန်မောင်မောင် (ကျူးဘား ပြည်မှ ကြယ်နီ)
- (နိုင်ငံတကာ အဘိဓာန်)
ပေဖူးလွှာမဂ္ဂဇင်းမှ ကူးယူဖေါ်ပြခြင်းဖြစ်ပါသည်။