ဖႜဳံဆိုဒ္ေဖါဟ္ ယာင္ၟတုံၟ
ဖႜဳံဆိုဒ္ေဖါဟ္သီးဆု္ဃွီ႔လာ ယာင္ၟတုံၟဆု္ထုင္းလီၟယို၀္သီး မဲြါအု္ကဲထင္းအု္ခင္းထၚ ထံင္ခ၀့္လဲ၊ မဲြါအု္အွ္ ထင္း ယွာင္ယိက္ယုဂ္လဲဏွ္ ခံင္ၟ႓ို၀္ဏါင္းယို၀္ယုဂ္္သီး လံင္အင္းဃွဴ႕ေသွ္ယါ့ေယာ၀္ၟ အွ္ဍၚေအးလွ္။
ဖႜဳံဆိုဒ္ေဖါဟ္သီးယို၀္ အ္ုထၚအု္႓ံင္အွ္၀ယ္ယိက္ ေဖံကုံဃွဳဂ္ ထံင္းကုံ႓ူး ကုဂ္ကုံ႓ူး အင္းလင္႓ူးသင့္ ေခါဟ္လု္ဖးဏွ္ မဲြါေ၀့ပါေဍ ဆု္ေဖါဟ္ဆု္အူး ထး မံင္ ခုဦ သယ္ဏွ္ကို၀္ၟ႓ႜင္ေဍေဆ၀္ၟလွ္။
႓ူးဟွံင္ ဟွဴ႕ဟွံင္ အင္းလင္႓ူးသင့္ေခါဟ္လု္႓ႜင္ ဍးကုံေလါဟ္သာမုက္သုင္းမုက္သာ ဃွဴၟလင္ေမွ္ပုံ ေဖါဟ္အူးထင္း ထး ခုဦ မံင္ ဟွံင္ ဃွါင္းပ်ေမွ္ပုံခ၀့္ခ၀့္ဏွ္ အု္ထၚ႓ံင္ကဲထင္းေဏ၀္ၟေ၀့ ယာင္ၟတုင္ၟဏွ္လွ္။
မူးလု္ဟွာ ခြါ႔လ္ုဟွာ လင္ပ်ေလါဟ္သာ ထုဂ္ထင္းခင္းလု္ခ၀့္ ယာင္ၟလင္လု္ခ၀့္ ဖူ႔က္ုဆယ္သၞ၀့္ အွ္မိင္လ ေခါဟ္လံင္ကႜာ ေခ်န္း ကု္ေခ်န္ ရ၀င္ နာဂ သယ္သီးလု္ဖး ခံင္ၟ႓ို၀္ဏါင္းယို၀္ အွ္ေ၀့ဍၚလွ္။
ဖႜဳံဆိုဒ္ေဖါဟ္သီးလု္၀ီၟ အွ္ေခါဟ္လံင္မိင္လကႜာ လ္ုဏိင္းလု္႓ႜင္ အင္းလင္႓ူးသင့္ေခါဟ္ခါ့ဏွ္ ဃွာင္းဃွံင္ ၀ေမွ္ပုံမူးေဍခြါ႔ ယါင္ၟပ်တုင္ၟအု္ထၚဏွ္ ကဲထင္းေဏ၀္ၟအု္ထၚေသွ္ေ၀့လွ္။
ဆု္လ၀္လု္ဏင္ဏွ္ ေယာ၀္လင္ေလံကႜဳဂ္ ခါ့ခင္းသၞ၀့္ ဆူဆူေလ၀္ေလ၀္ ကို၀္ပါင္ကို၀္က်ာဏွ္ ကဲထင္း ေဏ၀္ၟဆု္ယာင္ၟတုံၟဏွ္ ဟု္ဏယ္အု္လင္ၟဖိုင္ အွ္ေအးလွ္။
ယာင္ၟေလံကႜဳဂ္သီး ဟု္ကို၀္ေသွ္ဏွ္ ဟု္လု္ကို၀္ေဍယာင္ၟေလံကႜဳဂ္ ဟု္ကို၀္ေဍယာင္ၟတုံၟ ဖႜဳံဆု္ခႜါင္လု္ ကုဂ္ ပု္ယင္ဆု္ခႜါင္လု္ကုဂ္ဏွ္ ဟု္ဏယ္အင္းအု္လင္ၟအွ္ေအးလွ္။
ဟု္မႝီဟ္ဍဳံလုက္ေကာ၀္ၾကင္ေခါဟ္ဍါလု္ဖး ယးအြာ၊ ယးသိုင့္၊ ယး႓င္၊ ယး၀၀္လုက္ဆိင့္ အု္ဆိုဒ္ေဖါဟ္လု္ဖး ဆု္ထုင္းလီၟပါမုက္အွ္ေ၀့ ကို၀္ၟဆိုဒ္ေဍလွ္။
ခါန္ၟေဖါဟ္မူၟနဳက္ေဖါဟ္လု္ဖး အု္သီးေ၀့အု္တု္၀ါန္႔ေဖါဟ္ဆု္ထုင္းလီၟလု္ဖး မူးေဍခြါ႔ဖံင္းေလါတ္သာစူး ဃွာင္း၀ိင္၀ အူတႜာ္သာ က္ုဆယ္သၞ၀့္ ဖူ႔သၞ၀့္ အွ္ေ၀့ခံင္ၟ႓ို၀္ဏါင္းယို၀္ဍၚလွ္။
ဖႜဳံဆိုဒ္ေဖါဟ္သီး ဆု္ယာင္ၟတုံၟဏွ္ အု္ထၚအွ္၀ယ္ယိက္ လု္အင္းလင္႓ူးသင့္ေခါဟ္ ဃွာင္းဆု္ဆာၟ သုင့္အု္ ရံင့္သယ္အို၀္လွ္။
ဖႜဳံဆိုဒ္ေဖါဟ္ ထံင္လင္ထါင္ဆု္ဍါဖိုင္ မာဆိက္မာဏါသီးဍ၀္ ဖႜာကုံ႓ူး ကုဂ္ကုံ႓ူး ၀ီၟကုံ႓ူးဏွ္သီး အွ္ေ၀့ ခံင္ၟ႓ုိ၀္ဏါင္းယို၀္ဍၚလွ္။
ပႜိဳင္ကုံ႓ူးေကမူၟဏါ ဃွဴၟလင္ေမွ္ပုံဟွံင္ အူးထင္းေဍပီ႓ါ ေဖါဟ္ပ်ေဍထး ယိုင္ပ်ေဍထါေခါဟ္သယ္လွ္။
လု္ဏင္ဏွ္ဍ၀္ ေဖါဟ္အူးယိုင္ပ်ေဍထါေခါဟ္သီးကါေအး သုင္းဃွဳဲ႕သာယြာ ဖူ႔ကု္ဆယ္ ကို၀္ပါင္ကို၀္က်ာ ဃွာင္းပ်ေမွ္ပုံ ေဍမူးေဍခြါ႔ဆင့္လင္သာသၞ၀့္ဏွ္ ကို၀္ေ၀့ေဍယါင္တုံၟဏွ္လွ္။
လ္ုခါင့္ယို၀္ ဆု္ကို၀္ယါင္ၟတုံၟဏွ္ အါင္တုံၟအွ္ေ၀့လွ္။ ဖႜဳံဆိုဒ္ေဖါဟ္သီးယို၀္ ခါ့ထင္းခင္း စူးလု္ခ၀့္ ေဆါတ္ ပ် ေဍေဃွံ ေဍဖင္ဏွ္ ကို၀္ေ၀့ဍး အါင္ေဃွံအါင္ဖင္ဏွ္လွ္။
ေဃွံ ဖင္ လု္ပါ႓းလာဏင့္သီး စူးလာၟခ၀့္ အူ၀ိင္၀ပ် ခါ့ထင္း ဆူထါင္ ကု္ဆယ္ပ်ဏွ္ ကို၀္ေ၀့ေဍအါင္တုံၟ ဏွ္လွ္။ ယာင္ၟတုံၟဏွ္ ဖံင္းေလါတ္သာစူး ဖူ႔ကု္ဆယ္ ၀ိင္၀ဃွာင္းပ် ေမွ္ပုံဏွ္ မဲြါေ၀့အု္ထၚလွ္။
အာင္တုံၟဏွ္ဍ၀္ ခင္းခ၀့္႓းခါ့ပ် စူးလာၟခ၀့္ ႓ို၀္ထင္း အူ၀ိင္၀ပ်ဏွ္ ကဲထင္းေ၀့အု္ထၚဏွ္လွ္၊ ဖႜဳံဆိုဒ္ေဖါဟ္ သီး ထံင္လင္ဆ္ုဍါဖိုင္ ပႜိဳင္ကုံ႓ူး ဃွာင္းဆု္ဆါၟ သုင့္အု္ရံင့္ဏွ္ ပါမုက္ပါလာ ဖူ႔ကု္ဆယ္ စူးခြဲပ် ေဍမူးေဍခြါ႔ ကို၀္ပါင္ကို၀္က်ာဏွ္ ကဲထင္းသာ့ဆ္ုအါင္တုံၟဏွ္လွ္။
လု္၀ီၟဍးအို၀္ ဆု္ယာင္ၟတုံၟ အါင္တုံၟ အု္မဲြါအု္ခြါ႔အို၀္ အု္ခြါ႔ထိုင္ေခါဟ္သါ့ အု္မဲြါအု္မူးအို၀္ အု္မူးထိုင္ေခါဟ္ သာ့ ထုင္းလီၟအါင္ေ၀့တုံၟဏွ္လွ္၊ တုံၟဏွ္ဍ၀္ ထုင္းလီၟထါေခါဟ္ ဆုဂ္ေဏ၀္ၟဍဳံတု္၀ါန္႔အု္ဖႜံင္ ဆု္မူးဆု္ခြါ႔အု္ ဖႜံင္သယ္ဏွ္လု္မိင္၊ သင္ၟဏါခႜံင္ ထင္းေဍပုံ တုံၟဆု္အုဂ္ တုံၟထု္ရဲာ တုံၟပႝာၟ ဖႜင္းထင္းေဍ ဆု္အုဂ္ေခါဟ္ ဃွဲဳး ထု္ရဲာေခါဟ္ဃွဲဳး ပႝာၟေခါဟ္ဃွဲဳးဏွ္ အွ္လု္မိင္လွ္။
လု္ခါင့္ယို၀္ အု္ဏါင္လာၟခ၀့္ဏွ္ မဲြါအု္ခြါ႔ အု္ကႜါဏီ့ဟွာင္ၟဏွ္အု္မူးလုက္ခႜါ၊ မူးေဍခြါ႔ထုင္းလီၟဃွာင္းဃွံင္ ကံင္သို၀္ေဟွ၀္အြာ ထင္းေဍပုံ တုံၟဏင္ၟနံင့္ကးရီ့၊ တုံၟက္ုဆင့္အြါသယ္ဏွ္ အွ္ထင္းထါင္ေ၀့လွ္။
႓ုံးထု္၀သင့္ ေယာ၀္လင္သံဃာ့ေက်ာဟ္သယ္ဏွ္ ဆု္ဖူ႔ယွာၟလု္ေဖါဟ္ဖါၟ ဏီ့ေဖါဟ္ဖါသယ္ ဟွဴးထင္းဖိုင္ မုဂ္ ေက၀္သိုင့္ေက၀္လာ့ထင္းသာဟွံင္ ဆင့္လင္သာမာထင္းထာေခါဟ္ ထံင္ထုင္းလီၟ႓းဏွ္ ထုင္းလီၟ ၾကင္ဏွ္တာၟ ကို၀္သာ့ေ၀့ေဍတုံၟစင္ၟကႛယ္ဏွ္လွ္။
လု္ခါင့္ယို၀္ ေဖါဟ္သးဖႜဲာသယ္ပါမုက္ပါလာ ေဖါဟ္အူးေဟွ၀္႓းစဲ ေဍပုံဍံင္သယ္ မာထင္းထါေခါဟ္ လု္ ဆု္လင္ကိုဟ္သာဏွ္ဟွံင္ ထံင္ထုင္းလီၟေသွ္ထုင္းလီၟလွ္၊ ေဖါဟ္လု္မိင္ထုင္းလီၟလု္မိင္လာၟဏင့္ ထံင္လု္ အု္ထုက္ခို၀္း ပု္ထုက္သၞ၀့္ ဍယ္လင္စူးသၞ၀့္ဏွ္ ကို၀္ေ၀့တုံၟစင္ကႛယ္ေဆ၀္ၟလွ္။
လ္ုခါင့္လု္ခါင့္ယို၀္ မု္ထုင္းလီၟထင္းတုံၟ ဆင့္လင္သာ ဆီ့ဏင္လုက္ခႜါဏွ္ဟွံင္ တုံၟေခါဟ္လု္ဟွာ ကို၀္ယွာ ထင္း အင္းစာအု္သို၀္ လု္ပု္ယင္ခ၀့္ ယွဦဳ႕တိက္လူပ်ိဳ၀္ ယုက္လာပ်ီးလး တုံၟဆာၟလု္ဖး ႓းလ၀္ထင္းထါင္ ေအးဟွးလွ္။ ထံင္ဏွ္ဟွံင္ ယွဦဳ႕တိက္လူပ်ိဳ၀္ ယုက္လာပ်ီးဆို၀္ၟ တုံၟဆါၟလု္ဖး ႓းလ၀္ထင္းထါင္ ေအးဟွိဳ၀္ ေဆ၀္ၟလွ္။ လု္အင္းစါမု္ထုက္ဏွ္ လးလးမင္ယို၀္း၀း ကို၀္ယွာထင္းဟွံင္ မာထင္းထါေခါဟ္ ယာင္ၟထင္း တုံၟဏွ္ ကို၀္ေ၀့ဍး မင္ယို၀္းတုံၟဏွ္လွ္။
က်ာၟပင့္ ဟွယ့္လင္ဟွံင္လု္ခါင့္ယို၀္ ပၱံင္ထင္းတုံၟ မူးေဍခြါ႔လု္ဖးသီး မာထါေခါဟ္ဖႜဲ ထုင္းလီၟဖႜဲ ဖူ႔က္ုဆယ္ ဖႜဲစြး တုံဏွ္ကို၀္သာ့ေ၀့ေဍ တုံၟမင္ယို၀္းဏွ္ေဆ၀္ၟလွ္။
ဆု္ထုင္းလီၟသီးယို၀္ ေကာ၀္ၾကင္မႝီဟ္ေဖါဟ္အးဆိုဒ္ ထုင္းလီၟေ၀့ထၞာၟေဆ၀္ၟလွ္၊ ဖႜဳံဆိုဒ္ေဖါဟ္ဆု္ထုင္း လီၟ တုံၟဆု္ဃွီ႕ဆု္လာယို၀္သီး အု္ထၚအွ္၀ယ္ေ၀့ ယိက္ယုဂ္လွ္။
လ္ုခါင့္လု္ခါင့္ယို၀္ အွ္ဍိင္ေလါဟ္သာအု္ေခါဟ္စံင္ ထုင္းလီၟ႓းဍံင္ေလါဟ္သာ အွ္ေ၀့လု္ဏင္ေဆ၀္ၟလွ္။
လာဏင့္႓ို၀္ ဖႜဳံဆိုဒ္ေဖါဟ္အု္လိုဒ္ ခြိက္စူး ထုဂ္ခင္း စါင္းထင္းစါင္းလင္ဏွ္ ႓းဍံင္ေ၀့ ေဍဆု္ဃွာၟဃွံင္ ဆိုဒ္ ေဖါဟ္ေအးဏွ္ ဆု္ေသွ္ယာ့ေ၀့ ကို၀္ၟဟွာေဍလွ္။
ဖႜဳံဆိုဒ္ေဖါဟ္သီး တုံၟဆု္ထုင္းလီၟဏွ္ ႓းထုင္းလီၟသုင္းဃွဲဳ႕သာယ၀့္ သုင္းထု္လုံ႔သာထု္လုံ႔ ကို၀္ၟ႓ႜင္ေဍလွ္ ဆု္ဟွိဳင့္႓းလ္ုဖး ဆု္ဍး႓းလု္ဖး ဆု္သုင္းကု္လုဂ္သာကု္လုဂ္ ကို၀္ၟဟွာေဍလွ္။
ဏု္သီး ႓းသာေသွ္ယာ့အးထင္းေဆ၀္ၟစၚ႓ို၀္ အင္းဃွဴ႕ပ၀္ၟလိက္လု္ ၾဆာ့ မန္းသင့္ေနာင္(ေကာ့ကရိတ္) ေက၀္ထ၀ယ္ (အေရွ႕ပိုးကရင္) လိက္အုဂ္ဏွ္ ေသွ္ေ၀့ေဆ၀္ၟလွ္။
အွ္ဆံင္းလာၟဆၚ။
ဆု္ခႜါင္အင္းယာ့
ဆု္ခႜါင္အင္းယာ့
လိက္အု္ေ၀့ယို၀္ ဆု္ေကြ၀္ဏါင္းကု္ဆာၟအု္မိင္ ယု္ေသွ္ယာ့ေအးအု္ေခါဟ္စံင္ ယု္ေက၀္ဖႜဟ္ေဏ၀္ၟေအး ေဆ၀္ၟလွ္ အု္ေခါဟ္စံင္ ထိုင္ဖူ႔၀ဲါလု္အု္ေသွ္ယာ့ အု္မိင္ေဆ၀္ၟဍဴ ၿပိဳင့္စို၀္ထါင္႓းလာၟယု္ ဏင္ထီးဆၚ။
လိက္လု္႓ိင္းယို၀္ ယု္ထီသို၀္ စ၀္သုဲးဆိုဒ္(ဏံင္း႓ို၀္) ေဖွ္လင့္ထယ္ု အု္ေခါဟ္စံင္ ယု္ေက၀္ဖႜဟ္ထင္းေသွ္ ေ၀့ေဆ၀္ၟလွ္ အု္ေခါဟ္စံင္ စၚဂုဏ္႓း ယု္ထီသုိ၀္ ၾဆာ့ စ၀္သုဲးဆုိဒ္ေဆ၀္ၟလွ္ဆၚ။
0 comments:
Post a Comment