ဓာတ်ဆီဝယ်ယူသည့်ကားများ များပြားသည့်နည်းတူ ဓာတ်ဆီပြန်ရောင်းသည့် ကားများ များပြားလျက်ရှိ

ပုဂ္ဂလိက ဓာတ်ဆီဆိုင်များတွင် ဓာတ်ဆီဝယ်ယူသည့်ကားများ ပြည့်ကြပ်သည့်နည်းတူ ပြင်ပမှ ဆီပြန်လည်ဝယ်ယူသည့် ဆိုင်အချို့တွင်လည်း ဓာတ်ဆီပြန်ရောင်းသည့် ကားများ များပြားလျက်ရှိသည်ဟု သတင်းရရှိပါသည်။

''ဆီထုတ်တဲ့နေရာမှာတင် ကားများတာ မဟုတ်ဘူး။ တန်းစီစောင့်ရတာ မဟုတ်ဘူး။ ဆီပြန်ရောင်းတဲ့ နေရာမှာလဲ ရောင်းဖို့အတွက် ကိုယ့်အလှည့်ကျဖို့ကို တန်းစီစောင့်ဆိုင်း ရောင်းချတဲ့အထိ ကားတွေများနေတယ်''ဟု တာမွေမြို့နယ်မှ ယာဉ်ပိုင် ရှင်တစ်ဦးက ပြောကြားခဲ့သည်။

ထိုသို့ များပြားရသည့် အဓိက အကြောင်းမှာ ပုဂ္ဂလိက စက်သုံးဆီ ဆိုင်များမှ ဆီဝယ်ယူသည့် ဈေးနှင့် ပြင်ပဆီ ဈေးကွာဟချက်ကြောင့် ဖြစ်ကြောင်း သိရသည်။

''ဆိုင်မှာဝယ်တဲ့ ဈေးက တစ်ဂါလန်ကို ၂၅၀၀၊ ပြန်ရောင်းရင် တစ်ဂါလန်ကို ၃၂၀၀ ကျပ် ရတယ်ဆိုတော့ တစ်ဂါလန်ကို ၇၀၀ မြတ်တယ်။ အဲဒီအတွက် ထုတ်တဲ့နေရာမှာ တန်းစီနေသလို ပြန်ရောင်းတဲ့နေရာမှာ တန်းစီနေတာပေါ့''ဟု ပုဂ္ဂလိက ဓာတ်ဆီဆိုင်တစ်ခုမှ တာဝန်ရှိသူ တစ်ဦးကလည်း ဆိုသည်။

ထိုသို့ ပြင်ပဈေးနှင့် စက်သုံးဆီ ဆိုင်များမှ ရောင်းချပေးသည့်ဈေး ကွာဟရသည့် အဓိကအချက်မှာ နယ်မြို့များ၏ ၀ယ်လိုအားကြောင့် ဖြစ်သည်ဟု သိရသည်။

''နယ်မြို့တွေက ဆီဆိုင်ရှိတဲ့ မြို့ကလာတဲ့ ဆီတွေကိုပဲ အားထားရတာလေ။ ဒီတော့ ဆီဆိုင်က ၀ယ်ရင်းဈေးထက်တော့ အမြဲတမ်း နယ်ဈေးက မြင့်နေတာပေါ့။ ဒါပေမဲ့ အခုနောက်ပိုင်းကျတော့ ထင်ထားတာထက် ဈေးက ပိုမြင့်တက်လာတယ်။ အဓိက အချက်ကတော့ ပြည်နယ်ဘက်တွေကပါ ၀ယ်လိုအား ရှိလာတဲ့ အတွက်ပါ။ တစ်ချို့နယ်ဆို ဓာတ်ဆီတစ်ဂါလန် ကျပ် ၄၀၀၀ ကျော်၊ တစ်ချို့ကျတော့ ကျပ် ၃၇၀၀၊ တစ်ချို့ကျတော့ ကျပ် ၅၀၀၀ အဲဒီလို အမျိုးမျိုးရှိတယ်။ ခရီးအကွာအဝေးနဲ့ လမ်းပန်းဆက်သွယ်မှုပေါ် မူတည်ပြီး ဈေးကကွာနေတာ''ဟု ဆီဆိုင်တစ်ဆိုင်မှ တာဝန်ရှိသူတစ်ဦးကလည်း ရှင်းပြခဲ့သည်။

ဝယ်လိုအား မြင့်တက်သည် ဆိုပါက မည်သည့် ကုန်စည်မဆို ဈေးလိုက်ပါ မြင့်တက်သည်မှာ သဘာဝပင်ဖြစ်ပြီး ၀ယ်လိုအားဖြင့် ကိုက်ညီသည့် စက်သုံးဆီ ရောင်းချသည့်ဆိုင်များ ဖွင့်လှစ်ကာ ရောင်းချပေးမည် ဆိုပါက ၀ယ်လိုအား ရောင်းလိုအား မျှတကာ ဈေးတည်ငြိမ်သွားမည် ဖြစ်သည်ဟုလည်း သုံးသပ်ကြသည်။