ငမိုးရိပ်ချောင်း တစ်နေရာရန်ကုန်မြို့ရှိ မြစ်ချောင်းများ နံဘေးနှင့် အနီးအနား ပတ်ဝန်းကျင် ဆင်ခြေဖုံးမြို့နယ်ရပ်ကွက်များ၏ စနစ်ကျနမှုမရှိသော မိလ္လာစနစ် အသုံးပြုမှုများကလည်း မြစ်ချောင်းများ၏ အရည်အသွေးကို နိမ့်ကျလာစေပြီး ရေထုညစ်ညမ်းမှု ပမာဏကို မြင့်တက်လာစေကြောင်း သဘာပတ်ဝန်းကျင် ထိန်းသိမ်းရေးဆိုင်ရာ လုပ်ငန်းများကို လေ့လာနေသူအချို့၏ ပြောပြချက်အရ သိရှိရသည်။
ရန်ကုန်မြို့ရှိ မြစ်ချောင်းများ၏ ရေထုညစ်ညမ်းမှု ပမာဏမှာ အာဆီယံမှ သတ်မှတ်ထားသော စံနှုန်းများကိုများစွာ ကျော်လွန်လျက်ရှိပြီး ယင်းကဲ့သို့ ရေထုညစ်ညမ်းမှု ပမာဏများပြားနေခြင်းမှာ မြစ်ချောင်းများအနီးနှင့် နံဘေးရှိစက်ရုံများမှ စွန့်ပစ်လိုက်သော ရေဆိုးများ မြစ်ချောင်းထဲသို့ ရောက်ရှိနေခြင်းအပြင် အနီးပတ်ဝန်းကျင် ရပ်ကွက်များရှိ မိလ္လာသုံးစွဲမှုများ စနစ်မကျခြင်းများလည်း ပါဝင်နေကြောင်း သိရှိရသည်။ "ရန်ကုန်မြို့ရဲ့ အဓိကမြစ်ကြောအနေနဲ့ ရန်ကုန်မြစ်နဲ့ ပန်းလှိုင်မြစ်ရှိပါတယ်။ ကွဲထွက်သွား တဲ့ချောင်းအနေနဲ့ဆိုရင် ငမိုးရိပ်ချောင်း၊ ပုဇွန်တောင်ချောင်း စတာတွေရှိပါတယ်။ ပြီးခဲ့တဲ့ ဧပြီလအတွင်းက လှိုင်မြစ်နဲ့ ပန်းလှိုင်မြစ် ဆုံတဲ့ နေရာမှာရှိတဲ့ ရေအရည် အသွေးကို နမူနာယူပြီးလေ့လာ ကြည့်တဲ့အခါမှာ ရေထုညစ်ညမ်းမှုက တော်တော်ကို များနေတာတွေ့ရတယ်။ အဓိကတော့ မြစ်ရေချောင်းရေထဲမှာ ဓာတုဗေပစ္စည်းတွေ အများကြီးပျံ့နှံ့နေတာကို တွေ့ရတယ်။ အဲဒီလိုဖြစ်စေတဲ့ အဓိကအကြောင်းရင်းက ဘာလဲဆိုရင်မြစ်ချောင်းနံဘေး တွေက စက်ရုံတွေက ရေဆိုးတွေမြစ် ထဲကို စွန့်ပစ်ကြတယ်။ ပြီးတော့ မြစ်ချောင်းဘေး လူနေရပ်ကွက်တွေ နဲ့ ဆက်စပ်ဧရိယာတွေထဲမှာ မိလ္လာ သုံးစွဲတွေက စနစ်မကျဘူး။ အဲဒီ စနစ်မကျတဲ့ မိလ္လာစွန့်ပစ်မှုတွေကနေ ထွက်ရှိလာတဲ့ ရေဆိုးတွေကလည်း မြစ်ချောင်းထဲကို ရောက်ရှိပြီး မြစ်ချောင်းရေကို ညစ်ညမ်းစေတာပါ"ဟု ရေထုညစ်ညမ်းမှု အခြေအနေကို လေ့လာဖြစ်ခဲ့သူ တစ်ဦးက ပြောကြားခဲ့သည်။
ရန်ကုန်မြို့၏ မိလ္လာစွန့်ပစ်မှု အခြေအနေကို လေ့လာကြည့်ပါက လူနေထူထပ်သောရန်ကုန်မြို့တွင်းမြို့ နယ်များတွင်သာ မိလ္လာအနည်ထိုင် ကန်ကြီးများဖြင့် စနစ်တကျ အသုံးပြုကြပြီး ဆင်ခြေဖုံးနှင့် မြို့သစ်မြို့နယ်များတွင်မူ ကျင်းထဲသို့ စွန့်ပစ်သည့်ပုံစံများဖြင့် အများဆုံးအသုံးပြုကြကာ အချို့နေရာများတွင်မူ ယင်မလုံသည့် တိုက်ရိုက်စွန့်ပစ်သည့်ပုံစံ များလည်း ရှိနေသည်ဟု သိရသည်။ ယင်းကဲ့သို့ မိလ္လာစွန့်ပစ်မှုများကြောင့် မိုးတွင်းကာလတွင် ရေနှင့်အတူ အဆိုပါ မိလ္လာများ ရောပါသွားပြီး ၎င်းတို့မှာ မြစ်ချောင်းများအတွင်းသို့ ရောက်ရှိ စေခြင်းဖြစ်ကြောင်း သိရသည်။
"ရန်ကုန်မြို့ မြစ်ချောင်းတွေရဲ့ ရေထုညစ်ညမ်းမှု ဘယ်လောက်များသလဲ ဆိုတာကို ရေအရောင်ကို ကြည့်ပြီး သိနိုင်ပါတယ်။ ရေရဲ့အရောင်တွေက ကော်ဖီရောင်လို ဖြစ်နေတယ်။ အဲဒီလို ရေထဲမှာ ဓာတုပစ္စည်းတွေ ပျံ့နှံ့တဲ့အတွက် ရေနေသတ္တ၀ါတွေအတွက်လည်း စိုးရိမ်စွယ်ရာဖြစ်ပါတယ်။ ဓာတု ပစ္စည်းတွေကို စားသုံးမိရင် ရေနေ သတ္တ၀ါတွေ သေကြေပျက်စီးကုန် ကြမှာပဲ။ ဒါကြောင့် ဒီလိုမြစ်ချောင်းထဲကို စက်ရုံတွေရဲ့ စွန့်ပစ်ရေဆိုးတွေကို ထိန်းချုပ်တဲ့စနစ် တွေ လိုအပ်နေတဲ့အပြင် မိလ္လာစွန့်ပစ်မှုနဲ့ပတ်သက်ပြီး အသိပညာပေးမှုတွေလည်း လိုအပ်နေပါပြီ" ဟု သဘာဝ ပတ်ဝန်းကျင်ဆိုင်ရာ လုပ်ငန်းများကို လေ့လာနေသူ တစ်ဦးက ပြောပြခဲ့သည်။
ယင်းကဲ့သို့ စက်ရုံထွက် စွန့် ပစ်ရေဆိုးများကို ထိန်းချုပ်နိုင်ရန်အတွက် စက်ရုံများတွင် ကိုယ်ပိုင် ရေဆိုးသန့်စင်နိုင်သည့်ကန်များ ထားရှိရန်အတွက် သက်ဆိုင်ရာမှ အချိန်ပေး ပြုလုပ်စေခဲ့ရာ အရက်ချက်စက်ရုံ အများစုတွင်မူ ကိုယ်ပိုင် ရေဆိုးသန့်စင်နိုင်သည့် ကန်များထားရှိလာကြပြီ ဖြစ်ကြောင်း စက်ရုံလုပ်ငန်းရှင်တစ်ဦးက ပြောပြခဲ့သည်။ ထိုကဲ့သို့ ပြုလုပ်ရန်နှိုးဆော်ထားသည့် စက်ရုံများတွင် အရက်ချက်စက်ရုံ၊ သားရေစက်ရုံ၊ ပဲခွဲ စက်ရုံ၊ အအေးခန်း (ငါးပုစွန်) စက်ရုံ၊ ဆိုးဆေးအသုံးပြုသော အထည်စက်ရုံ၊ ငံပြာရည်စက်ရုံ၊ အချိုရည်စက်ရုံများနှင့် ဓာတုဗေဒ ပစ္စည်းသုံးစက်ရုံများ ပါဝင်ကြောင်း သိရသည်။
0 comments:
Post a Comment