လျော်ကြေးပေး လယ်သိမ်းပြီး လယ်မလုပ်သည့်ကုမ္ပဏီ ရုပ်သိမ်းခံရမည်

ကန်ထရိုက်လယ်ယာစနစ် လုပ်ကိုင်သည့် ကုမ္ပဏီများ တောင်သူတိုးတက်အောင် ဖော်ဆောင်ပေးခြင်းမရှိဘဲ လျော်ကြေးပေးကာ လယ်ယာမြေသိမ်းယူခြင်း၊ လယ်မစိုက်ဘဲ ငါးကန်ကဲ့သို့ လတ်တလောအကျိုးရှိသည့်လုပ်ငန်းများ လုပ်ကိုင်ခြင်းမျိုးပြုလုပ်ပါက ကုမ္ပဏီအား ပြန်လည်ရုပ်သိမ်းသွားမည်။

ဦးသိန်းစိန်ပြောထားတာလေး နားဆင်ကြည့်ကြစို့

Source Audio from http://www.bbcburmese.com

လယ်ယာစိုက်ပျိုးရေးနှင့် ဆည်မြောင်းဝန်ကြီးဌာန၀န်ကြီးဦးမြင့်လှိုင်၊ ရန်ကုန်တိုင်းဒေသကြီး ၀န်ကြီးချုပ် ဦးမြင့်ဆွေနှင့် စိုက်ပျိုးရေး၊ ဆည်မြောင်းဌာနများမှ တာဝန်ရှိသူများနှင့် ရန်ကုန်တိုင်းဒေသကြီး၊ ဧက ၁၀၀၀၀ ခေတ်မီစက်မှုလယ်ယာစံပြစိုက်ပျိုးရေး အထူးဇုန်အတွင်း စိုက်ပျိုးလုပ်ကိုင်လျက်ရှိသည့် ကုမ္ပဏီများမှ တာဝန်ရှိသူများသည် ဧပြီလ ၁၄ ရက်နေ့က ကန်ထရိုက်လယ်ယာလုပ်ကိုင်မှု၊ စက်မှုလယ်ယာစနစ်သို့ ဦးတည်လုပ်ကိုင်မှု၊ စိုက်ပျိုးရေးနည်းပညာနှင့် မျိုးကောင်းမျိုးသန့်များ စိုက်ပျိုးထုတ်လုပ်မှုပိုင်းများအား တွေ့ဆုံဆွေးနွေးခဲ့ကြောင်းသိရသည်။

ကန်ထရိုက်လယ်ယာစနစ် လုပ်ကိုင်သည်ဆိုခြင်းမှာ အရင်းအနှီးစိုက်ထုတ်နိုင်သူနှင့် တောင်သူပူးပေါင်းခြင်းဖြင့် ပိုမိုကောင်းမွန်စေရန် ရည်ရွယ်လုပ်ကိုင်ခြင်းဖြစ်ကြောင်း၊ ထို့အတွက် တောင်သူများတိုးတက်စေရန် ကန်ထရိုက်လယ်ယာစနစ်ကို ဖော်ဆောင်ပေးခြင်းဖြစ်ကြောင်း၊ တောင်သူများတိုးတက်မှုကို ဖော်ဆောင်ပေးခြင်းမပြုဘဲ တောင်သူများအား လျော်ကြေးပေးကာ လယ်သိမ်းယူခြင်း၊ လုပ်ကိုင်ရန်ရယူထားသော လယ်ယာမြေပေါ်တွင် စိုက်ပျိုးခြင်းမပြုဘဲ လတ်တလောအမြတ်စွန်းငွေရရှိသည့် ငါးကန်ကဲ့သို့သော လုပ်ငန်းများပြောင်းလဲလုပ်ကိုင်ခြင်းများ ရှိလာပါက လုပ်ကိုင်သည့်ကုမ္ပဏီများအား ပြန်လည်သိမ်းယူသွားမည်ဖြစ်ကြောင်း ရန်ကုန်တိုင်းဒေသကြီးမှ တာဝန်ရှိသူတစ်ဦးက ပြောကြားခဲ့သည်။

"လုပ်ငန်းရှင်နဲ့ တောင်သူပူးပေါင်းရင် ပိုကောင်းမွန်တဲ့အတွက် ကန်ထရိုက်လယ်ယာစနစ်ကို ခွင့်ပြုလုပ်ကိုင်စေတာပါ။ တချို့ကုမ္ပဏီတွေက တောင်သူကို လျော်ကြေးပေးပြီး တောင်သူထွက်သွားအောင် လုပ်နေတာတွေရှိပါတယ်။ တချို့ကုမ္ပဏီကျတော့လည်း တောင်သူတွေရဲ့ မိသားစုကျန်းမာရေး၊ ပညာရေး၊ နောက်တောင်သူကို စိုက်ပျိုးရေးနည်းပညာပါ ပေးနေကြပါတယ်။ တောင်သူထဲမှာလည်း တချို့အလုပ်တကယ် ပီပီပြင်ပြင်မလုပ်တဲ့ တောင်သူရှိနိုင်ပါတယ်။ ကုမ္ပဏီတွေက တောင်သူတိုးတက်အောင် ဖော်ဆောင်ပေးပါ။ တောင်သူတွေကလည်း ကောင်းမွန်စွာ လုပ်ကိုင်ပါ။ ပီပီပြင်ပြင် မလုပ်တဲ့တောင်သူရှိရင် ကုမ္ပဏီဘက်က အထောက်အထားနဲ့တင်ပြပါ။ ဒီလိုပဲလျော်ကြေးပေးပြီး တောင်သူကိုမောင်းထုတ်တဲ့ ကုမ္ပဏီမျိုးတွေ့ရှိရင် ကုမ္ပဏီကို ပြန်သိမ်းချင်သိမ်းသွားမှာပါ။ ကုမ္ပဏီတချို့က လယ်ယာစိုက်ပျိုးဖို့မလုပ်ဘဲ လတ်တလော ငါးဈေးကောင်းတယ်ဆိုရင် ငါးမွေးလုပ်တာမျိုးတွေရှိတယ်။ လ/န ၃၉ ကျပြီးမှ မွေးတာဟုတ်မဟုတ် ပြန်စစ်ပါမယ်။ ခွင့်မပြုနိုင်ပါဘူး။ တစ်ဧက စိုက်ပျိုးဖို့ကျန်ရင် တစ်ဧကထိခိုက်ပါတယ်။ တောင်သူတွေဆီကနေ ပေါက်ဈေးနဲ့ပြန်ဝယ်ပါ။ တောင်သူနဲ့ကုမ္ပဏီ နှစ်ဖက်ပူးပေါင်းပြီး စက်မှုလယ်ယာစနစ်ကိုသွားမယ်။
လိုအပ်တဲ့စက်ကိရိယာတွေအတွက်လည်း တောင်သူ ၅၀၀ တစ်ဖွဲ့၊ ၅၀၀ တစ်ဖွဲ့ပုံစံမျိုးနဲ့ စက်မှုကုန်ထုတ် အသင်းဖွဲ့ပြီး လိုအပ်တဲ့စက်ကိရိယာတွေ တပ်ဆင်ဖို့လုပ်သွားပါမယ်။ စက်မှုလယ်ယာစနစ်ကို ရန်ကုန်တိုင်း ဒေသကြီးကနေ စံပြအဖြစ်လုပ်ကိုင်သွားဖို့ရှိပါတယ်"ဟု အဆိုပါ တာဝန်ရှိသူက ပြောကြားခဲ့ပါသည်။

လယ်ယာစိုက်ပျိုးရေးနှင့် ဆည်မြောင်းဝန်ကြီးဌာန ၀န်ကြီးဦးမြင့်လှိုင်က မျိုးစပါးနှင့်ပတ်သက်၍

"မျိုးစပါးကို အမျိုးမျိုး မသုံးစွဲသင့်ပါဘူး။ တကယ်လည်း အထွက်ကောင်းတယ် ဈေးကွက်ဝင်တဲ့ မျိုးတစ်မျိုး၊ ပမာဏ များများနဲ့ လိုသလောက်ထုတ်နိုင်တဲ့ မျိုးတစ်မျိုးကိုပဲ ဦးတည်သုံးသင့်ပါတယ်။
မျိုးစပါးတွေဟာ တစ်ခုနဲ့တစ်ခုနီးကပ်ရင် မျိုးပျက်တတ်ပါတယ်။ မျက်စိနဲ့မမြင်နိုင်တဲ့ ၀တ်မှုန်ကူးမှုတွေရှိ
ပါတယ်။ လက်တွေ့ ကျွန်တော်စိုက်ပျိုးခဲ့တာကို ပြောပြပါမယ်။
ရှစ်လမ်းသွားလမ်းမကြီးတစ်ခုကိုခြားပြီး တစ်ဖက်မှာ ကောက်ညှင်းငချိပ်၊ တစ်ဖက်မှာအခြားမျိုးစိုက်ပါတယ်။ ကောက်ညှင်းငချိပ်က ငချိပ်မဟုတ်ပဲ ဖြူကြောင်ကြားတွေ ထွက်လာပါတယ်။ မျိုးကိုသီးသီးသန့်သန့်ပဲ သုံးသင့်တယ်"ဟုပြောကြားခဲ့သည်။

တောင်သူများ မျိုးစပါး၊ စိုက်ပျိုးနည်းပညာများ ပိုမိုသိရှိလာစေရန်အတွက် ကုမ္ပဏီများမှ ပံ့ပိုးခြင်းအပြင် မီဒီယာများ၏ အခန်းကဏ္ဍမှာ အဓိကအရေးပါလာကြောင်း ရန်ကုန်တိုင်းဒေသကြီးဝန်ကြီးချုပ် ဦးမြင့်ဆွေနှင့် လယ်ယာစိုက်ပျိုးရေးနှင့် ဆည်မြောင်းဝန်ကြီးဌာန ၀န်ကြီးဦးမြင့်လှိုင်တို့က ပြောကြားခဲ့ပါသည်။

ရန်ကုန်တိုင်းဒေသကြီး အတွင်းရှိ ဧက ၁၀၀၀၀ ခေတ်မီစက်မှုလယ်ယာစံပြစိုက်ပျိုးရေးအထူးဇုန်အတွင်း တောင်သူများနှင့် ကုမ္ပဏီ ၁၅ ခု ပူးပေါင်းကာ ကန်ထရိုက်လယ်ယာစနစ်ဖြင့် လုပ်ကိုင်လျက်ရှိကြောင်း သတင်းရရှိပါသည်။

သတင်းနှင့် သတင်းဓါတ်ပုံ ရင်းမြစ် http://www.news-eleven.com


Source Audio from http://www.bbcburmese.com