ထိုင်းနယ်စပ် မဲဆောက်မှာ DKBA တပ်သား လက်ပစ်ဗုံးကိုင်ဆန္ဒပြ

ထိုင်းနယ်စပ် မဲဆောက်မှာ DKBA တပ်သား လက်ပစ်ဗုံးကိုင်ဆန္ဒပြ

2011-01-04

ဒီကနေ့ ဇန်နဝါရီ ၄ ရက် မနက် ၈ နာရီလောက်က ထိုင်းနိုင်ငံ မဲဆောက်မြို့မှာ ရှိတဲ့ UNHCR ကုလသမဂ္ဂ ဒုက္ခသည်များ ဆိုင်ရာ မဟာမင်းကြီး ရုံးခွဲ ရှေ့မှာ နယ်ခြားစောင့် တပ်ဖွဲ့ဝင်အဖြစ် ပြောင်းလဲခဲ့သူ DKBA ၉ သုံးလုံး တပ်ရင်းက စောထိန်လင်း ခေါ် စောသံမဏိဟာ လက်ပစ်ဗုံး နှစ်လုံး ကိုင်ဆောင်ပြီး ဆန္ဒပြခဲ့ကြောင်း သတင်းရရှိပါတယ်။
မြန်မာပြည် ပြဿနာကို ကုလသမဂ္ဂ ကူညီဖြေရှင်းပေးဖို့နဲ့ လက်ရှိ ဖြစ်ပျက်နေတဲ့ နိုင်ငံရေး အခြေအနေတွေကို လက်မခံနိုင်လို့ လုပ်တာဖြစ်တယ်လို့ အဲဒီ ဆန္ဒပြသူက ဆိုပါတယ်။

အငှားဆိုင်ကယ်သမားကို ဓားစာခံလုပ်ပြီး လက်ပစ်ဗုံးကိုင် ခြိမ်းခြောက်ဆန္ဒပြသူဟာ ဒီကေဘီအေ ၉ သုံးလုံး တပ်ရင်းက အသက် ၃၅ နှစ် ဝန်းကျင်ရှိသူ စောထိန်လင်း (ခေါ်) စောသံမဏိ ဖြစ်ပါတယ်။

ဒီအဖြစ်အပျက်ကို တွေ့မြင်လိုက်ရတဲ့ မျက်မြင်သက်သေတဦးက အခုလိုပြောပြပါတယ်။

“အဲ သူက အဲဒီမှာ ဆိုင်ကယ် တက္ကဆီသမား အဖိုးကြီးတယောက်ကို ဆိုင်ကယ် ငှားစီးလာတယ်။ ဆိုင်ကယ်ဦးထုပ်ကို ဆောင်းထားတယ်။ ဦးထုပ်က ကြိုးက မျက်လုံးတဖက်ကို ဖုံးနေတယ်။ သူ့လက်ထဲမှာကတော့ လက်ပစ်ဗုံးလို့ ယူဆရတဲ့အရာ နှစ်ခုကို သူဆုပ်ထားတယ်၊ အဖိုးကြီးကို ဖက်ပြီးတော့။ အဲဒီအချိန်မှာ UN ရုံးကနေပြီးတော့ ရဲစခန်းကို အကြောင်းကြားလိုက်ပုံ ရတယ်၊ အဲဒီမှာ ရဲတွေ ရောက်လာတယ်။ ရဲတွေ ရောက်လာပြီးတော့ သူ့အနားမှာပဲ ဝိုင်းပြီးတော့ သူ့ကို ဖျောင်းဖျကြတယ်။ တော်တော်နဲ့တော့ ဖျောင်းဖျလို့ မရဘူး၊ ၉ နာရီနဲ့ ၅ မိနစ်လောက်မှာ သူ လက်နက်ချလိုက်တယ်။”

တနာရီလောက် ကြာအောင် ထိုင်းရဲတွေနဲ့ ညှိနှိုင်းပြီးနောက် စောသံမဏိဟာ လက်နက်ချခဲ့ပါတယ်။ သူဆန္ဒပြရတဲ့ အကြောင်းရင်းတွေနဲ့ ပတ်သက်ပြီး စာရွက်တရွက်မှာ ရေးသားထားတယ်လို့ ဆို ပါတယ်။

ဒီအထဲမှာ ဒီကေဘီအေဟာ မြန်မာစစ်တပ် လက်အောက်ခံ နယ်ခြားစောင့်တပ် မဖြစ်စေဖုိ့နဲ့ ကရင်ကို ဒီမိုကရေစီနည်းအရ ကရင်ကပဲ အုပ်ချုပ်ဖို့၊ နိုဝင်ဘာ ၇ ရက် ရွေးကောက်ပွဲကို တိုင်းရင်းသားတွေ လက်မခံနိုင်လို့ စတဲ့ အချက်တွေ ရေးသားထားတယ်လို့ ဆိုပါတယ်။

ထိုင်းရဲတွေက တရားမဝင် နိုင်ငံအတွင်း ဝင်ရောက်မှု၊ တရားမဝင် စစ်လက်နက် ကိုင်ဆောင်မှုစတဲ့ ပြစ်ချက်တွေနဲ့ အရေးယူမယ်လို့ သိရပါတယ်။

ထိုင်းဥပဒေအရ တရားမဝင် စစ်လက်နက်ပစ္စည်း ပိုင်ဆိုင်မှုအရ အပြစ်ရှိကြောင်း ထင်ရှားရင် ထောင်ဒဏ် တသက်အထိ ပြစ်ဒဏ်ချမှတ်နိုင်ပါတယ်။

ဒီသတင်းနဲ့ ပတ်သက်လို့ အဖမ်းဆီးခံထားရတဲ့ ကိုစောသံမဏိနဲ့ မဲဆောက် မြို့တော်ဝန်တို့ကို မေးမြန်းပြီး RFA သတင်းထောက် ကိုမိုးကျော် သတင်းပေးပို့ထားပါတယ်။

Copyright © 1998-2010 Radio Free Asia. All rights reserved.



THANK YOU
GRANDFATHER TAR MIKE