ၾတာစံင္မံင္ဆါၟ ဟွယ့္ကဲထင္းအု္ဟွာင္ၟ

Source Photo from http://www.google.com/images

ၾတာစံင္မံင္ဆါၟ ဟွယ့္ကဲထင္းအု္ဟွာင္ၟ

(စ၀္ေထါဟ္တြၚ)

ဆု္လု္ၾတာစံင္မံင္ဆါၟယို၀္ လု္ပု္ယင္ခ၀့္(အာဏာရွင္)ေဆ၀္ၟလွ္။ ၾတာစံင္မံင္ဆါၟဟွယ့္ကဲထင္းယို၀္ မဲြါဟွယ့္ကဲထင္း ဍး အု္သာေဍအု္ကု္ဆါၟလု္မဲြါ႓း၊ ဆု္အင္းတါင္ထင္းအု္ေခါဟ္စံင္ ဟွယ့္ကဲထင္းေ၀့ေဆ၀္ၟလွ္၊ မဲြါပ၀့္လဲအင္းတါင္ ထင္းဆု္ဏွ္ ဆု္ေအအင္းစါေဆ၀္ၟစၚ႓ို၀္ ဆု္အင္းတါင္ဆါၟဏွ္ မဲြါေ၀့ ဏု္၊ ယု္ ၊ ပု္ လုက္ဆိင့္အင္းတါင္ေ၀့ေဆ၀္ၟလွ္။

လု္ခႜဳဂ္လု္လ၀္ထါင္ယွံင္ ၾတာစံင္မံင္ ဟွယ့္ကဲထင္းအု္ဟွာင္ၟဍၚ႓းခါ့ ပု္မု္ေယါ၀္ၟထါင္ ပ္ုဖႜံဳေဖါဟ္ေမင္ၟစိင္ ဏင္ၟစယ္၊ ပု္ဖႜံဳဆိုဒ္ယို၀္ အဲဆု္ယွဴးဆု္႓ါ ဆု္ယွိက္ယွဳက္ပၚပုဂ္သယ္ မါေ၀့ကဲေအး ဍးပၡံင္႓းသာေအး၊ အးတု္ေလံ ပႜယ္သာေ၀့ လွ္ ပႜယ္သာေသွ္လုိင္ေအး မု္ပႜယ္သာအု္လင္ၟအွ္လိုင္ေအး စၚ႓ို၀္ဍဴ စင္းထင္းေမံ၀ယ္ခယ္ဟွံင္ ဆု္ယွိက္ယွဳက္ဆု္ ပၚပုဂ္ ဆု္လု္႓းပီ႓းစင္း႓းလု္စံင္းဏွ္ အင္းတါင္ေ၀့ေဍ ဆု္သုင္းထင္းသာဟွာင့္ ဆု္သာဖႜီၟသီးလု္ဖး ဏွ္ေဆ၀္ၟလွ္။

ဆု္လု္ဟု္ မု္အင္းတါင္႓းဆု္ယို၀္ ဟု္သာဖိုင္ထို၀္ ႓းအွ္ေ၀့ယွဴးယွဴးခႜိင္းခႜိင္းေဆ၀္ၟလွ္၊ ဟု္သာေအကု္လုဂ္က္ုမိုင့္ ဟု္သုင္းထင္းသာထင္းခါ့ ပု္ေအအင္းတါင္႓းဆု္ မဲြါအု္ေဟွ၀္ ပု္ေအလ၀္ထါင္ကင္ကါယွံင္ဆု္မြဲါအု္ေဟွ၀္ ဆု္တု္ပႜိင္ တု္ဖႜးအွ္ထင္းေသွ္ေ၀့အးအးေလံ ေဆ၀္ၟလွ္။

ပု္ယင္ဆု္ခႜါင္အွ္ေ၀့ (လူမိုက္သားရမ္းကား လူလိမၼာသားယဥ္ပါး)ဆု္ခႜါင္အု္ေ၀့ဏွ္ ယ္ုလု္ဟွာဆု္ဆံင့္မံင္းဏွ္ မဲြါဍး သာလွ္၊ ပု္ေအလ၀္ဆု္ခႜါင္ေအေသွ္ ေအ႓းဍဴ ဆု္ဆံင့္ဏး မုက္ဏွ္တာၟ ဆု္ဖံင္းယွံင္ဖၚယွံင္ေဍဟု္ မု္မုက္ေ၀့လွ္၊ အု္ ခ၀့္ပု္ယ၀့္ဏွ္ ဟု္မႝီဟ္ အိုင္ခၚေဖါဟ္လီဏွ္ ထု္႐ိုဒ္ၟ၊ ဟု္မႝီဟ္ေတၢတ္ပု္၀ါေဟွ၀္ေဖါဟ္လီဏွ္ အု္ဏာၟ႓ူး၊ေ႓့ယု္ဏးေသွ္ သို၀္ ယု္ပုဂ္ထင္းအု္ခ၀့္ပု္ယ၀့္ အု္ေခါဟ္စံင္ ဆု္တု္ပႜိင္တု္ဖႜးေအအွ္ခ၀့္အို၀္ ပႜယ္တ၀္လာၟ ဆၚ။ အင္းတါင္႓းထါင္ လာၟဆၚ။

ပု္ယင္ဆု္ခႜါင္ အု္လု္မိင္ဏွ္ဍ၀္ (လူေျဖာင့္စိတ္တို လူခ်ိဳ စိတ္ေကာက္) ဆု္ခႜါင္အု္ေ၀့ဏွ္ဍ၀္ ဟု္မႝီဟ္ အု္သုင္းသာ တ၀္လံင္ဏွ္ အု္သာဖိုဟ္၊ ဟု္မႝီဟ္ခႜါင္ဆု္ဆိုင့္ခႜိင္းဏွ္ အု္သာကါင္းကံင္း လ၀္ေ၀့ေ႓့ဏွ္၊ အု္ေခါဟ္စံင္ ဍံဳလုက္သံင့္္ သါ့ေခါဟ္ဍါယို၀္ ဟု္တု္ေက၀္႓းဆု္ ကးသု္ကာမာၟလွ္၊ အ္ုေခါဟ္စံင္ လုံၟမႝိက္ သိင္ၟလာ့သီးလု္ဖး အု္ဏိင့္အွ္ ဆၚအး လယ့္ ဏွ္ ဟု္တု္ေက၀္႓းကးသို၀္ ဟု္မႝီဟ္လု္ဟွာ အု္ေ၀့ေတၢတ္ပု္၀ါ မု္မာသာေ႓့ေသွ္သို၀္လယ့္ဏွ္ ဟု္တု္ေက၀္႓းကးဏါင္း လုံၟမႝိက္ သိင္ၟလာ့အု္လူၟအု္ဃဦွဳဏွ္ ေဆ၀္ၟလွ္ ပု္ယင္လ၀္ေ၀့(စိန္ကဲ ေက်ာက္ကဲ ထိုႏွစ္ကဲထက္ လူကဲခတ္ရ လြန္ခဲတတ္၏) ေဆ၀္ၟလွ္။

အု္ေခါဟ္စံင္ ဟု္မႝီဟ္လု္ဟွာေဟွ၀္ လု္ဟွာေဟွ၀္ မြဲါအု္အိုင္အု္ခၚဟွ မဲြါအု္ေဟွ၀္အု္အြါဟွဏု္ မု္ဆိုင့္ေထံ ေဍဆု္လူၟ ဆု္ခႜါင္လု္မိင္လွ္ လု္ေသွ္ေဆ၀္ၟ႓း၊ အု္သုင္းသာမာသာေ႓့ေသွ္သို၀္လဲဏွ္ ပု္မု္႓းေယာ၀္ၟ အု္ဆု္ဖၚဆု္မာေဍ အ္ုေ၀့ အု္ဆု္လ၀္ မဲြါအု္ပ်ဳက္ေလါဟ္သာဟွ မဲြါတု္ဖႜးသာေဆ၀္ၟဟွ ဏွ္ေဆ၀္ၟလွ္။

Source Photo from http://www.google.com/images

ပု္ဖႜဳံေဖါဟ္ယို၀္ ႓းသာဆု္ယွဴးဆု္႓ါ မု္အွ္႓းသာ လု္ဆု္ဆိင့္ဆိင့္ေဖႜ၀့္ေဖႜ၀့္ကႜာ ဆု္ကု္လုဂ္က္ုမိုင့္ ဆု္စီ့စး စီ့ဖႜိက္ကႜာ အွ္ေ၀့မုက္ေအးအု္ေခါဟ္စံင္ ဆု္ကးဆု္ဟွယ္ေအအွ္ထင္းလု္မိင္မိင္ ဆု္ယွိက္ယွဳက္ပၚပုဂ္မု္ကဲထင္းလ၀့္႓ွ္ စၚ႓ို၀္ ထုဂ္ယွးလင္သာ ပႜယ္သာ ပီပီလွ္၊ ဆု္ေအဟွယ့္အင္းဟွဳက္ မာဟွာဟွံင္ဆ္ုစၚ႓ို၀္ မာဍးေ၀့ ဆု္လင္ၟအွ္လု္ပုင္ မာလု္ယါ့ အင္းလု္ယါ့ ဟွံင္လွ္ အးတု္ေလံဆံင့္မံင္းဆု္ေ႓့ဏွ္ အု္ေခါဟ္စံင္ ၾတာစံင္မံင္ဆါၟ ဍိင္ထင္းေ၀့လု္ ပု္အု္ ထိုင့္အု္ကႜာ အု္အံင္ဖိုင္ေဆ၀္ၟလွ္။

ၾတာစံင္မံင္ဆာၟဏွ္ အင္းနိဳင့္နဳင့္ဏာေ၀့ပု္ လင္ဆိုဒ္ေဖါဟ္လင္ဆိုဒ္လီ ေဆ၀္ၟလွ္၊ ၾတာစံင္မံင္ အင္းနိဳင့္မာဆါ့ပု္ အု္ေခါဟ္စံင္ ပု္ဖႜဳံလိက္ဖႜဳံဘာၟ အွ္ေအး၊ ပု္ဖႜံဳလိက္ဖႜံဳဘာၟ ေအအွ္ထင္းစၚ႓ို၀္ဍဴ ပု္ဖႜံဳေဖါဟ္သီးလု္ဖး ဆု္ေသွ္ယာ့ဆု္ ဏးေသွ္ မု္အွ္ထင္း မု္အးထင္းသီးလု္ကါဍၚ ဆု္ေသွ္ယါ့ဏးေသွ္ေအအးထင္း႓ွ္ စၚ႓ိုင္ေ႓့အု္သီးသာအွ္သို၀္ မု္ပိုင္ ကႜိဳင္ပု္ ေသွ္လိုင္ေအး၊ ေ႓့အု္သီးသာအွ္သို၀္ မု္အင္းမိုင့္အင္းပု္ ေသွ္လိုင္ေအး အ္ုေခါဟ္စံင္ ပု္လိက္ဖႜဳံဘာၟဏွ္ ဍၚ အွ္ေ၀့ေအးေဆ၀္ၟလွ္။

ပု္ဖႜံဳဆုိဒ္ေဖါဟ္ယို၀္ ဆု္အဲဆု္ကဦုအွ္ေဍါဟ္ဆါ့မာၟလွ္၊ဏယ္အင္းဆု္သီးယ၀့္ဆါ့မာၟလွ္၊
လု္ဟွာေဍလု္ဟွာ ေသွ္ယါ့ဍး ေမံေလါဟ္သာ လု္႓ႜင္လု္ထါၟတာၟဏွ္ ေကါ၀္ဍံင္းေလါဟ္သာလွ္၊ ဏု္ခ၀့္
ဏု္ေဖါဟ္မူးေဖါဟ္ခြါ႔အွ္ ယု္ခ၀့္ယု္ေဖါဟ္ မူး ေဖါဟ္ခြါ႔အွ္ အု္ေခါဟ္စံင္ ပု္ေကါ၀္ဍံင္းေလါဟ္သာဏွ္ မဲြါေ၀့ ဆု္ဃွဴ႕ဃွင္လု္မိင္အု္ေခါဟ္စံင္ ေဟွ၀္ဍးသာလွ္။

လာၟဏင့္႓ို၀္သီး ဆု္အွ္ကံင္းသယ္ေအအွ္ေဆ၀္ၟ၊ ႓းဆိုင့္ေထံဆု္ ေအအွ္ေဆ၀္ၟစၚ႓ို၀္ လု္ဟွာေဍလု္ဟွာ ညာၟယွဳဂ္
ေလါဟ္သာဟွ မာယွိက္ယွဳက္ဆု္ လု္ကဲ႓းဟွ ဏွ္ ေသွ္ယါ့ထီ့ဆာေအး၊ ဆု္ေအအင္းစါထင္းလု္မိင္မိင္ ေအလ၀္
ထင္း လု္ဟွာ ေအခႜါင္ထင္းလု္ဟွာဟွာ႓ွ္ စၚ႓ို၀္ ဍံင္းဖူ႔ယွာၟေဟွး ဏု္ေအဟွံင္ဏွ္ ဟွံင္လွ္ (ဒို႔ဖူးပြါ႔ နာေမး၀ီေန ၀ီ ေလါ့)
လ၀္ထင္းဆု္ေ႓့ဏွ္ အု္ဖိုင့္အးထင္း အု္႓ႜင္အးထင္း ဏွ္တာၟ ဆု္လ၀္ဆု္႓ုံး ဆု္ခႜါင္ဆု္ေသွ္လု္ဖး ကဲထင္းေ၀့ ၾတာစံင္မံင္
ဆာၟေဆ၀္ၟလွ္။

Source Photo from http://www.google.com/images

အု္သီးေ၀့ဍး ဍိင္ယိက္ေဍ ဆု္ယွံင္ဆု္မုဂ္အွ္ထင္းအု္ေခါဟ္စံင္ ထံင္ဍးအု္သီးေ၀့မု္မာ႓းသာ ထံင္ဍးအု္သီးေ၀့ မု္အင္း တါင္႓းသာ ထံင္ဍးအု္သီးေ၀့ သာအွ္သို၀္မာထင္းေ၀့အု္ေခါဟ္စံင္ မႝီဟ္ေဏ၀္ၟ႓းပိုင္လု္ဖး(လူ႔အခြင့္အေရး ရပိုင္ခြင့္) ပု္ဖႜံဳေဖါဟ္အု္ထိုင့္အု္ကႜာ လင္မာၟဟွာဟွံင္ထင္းေ၀့ အးအးေလံ ေဍါဟ္ေဍါဟ္ေလံေဆ၀္ၟလွ္။
ေ႓့သို၀္ၾတာစံင္မံင္ဆါၟ လု္အွ္လိုင္႓းသို၀္ ပု္သီးကို၀္ၟအု္ဟွာ အင္းတါင္႓းထါင္ ေဏ၀္ၟဍးေ၀့ဆၚ။

ဆု္အွ္ဆံင္းအွ္ခႜါင့္ ဍဳဂ္ပါင္ ယိုင္ဃွဦဳ႓းလာၟ ကို၀္ၟဟွာေဍဆၚ။

စ၀္ေထါဟ္တြၚ
ကႜံဳပိုင္ၟ(ေကါ၀္ၾတာ္ ခင္းထၚလ)