ပန်းချွေစခန်းမှသည် ရှေ့သို့ချီ

ဆရာအောင်ဇေဟာ ဒီမိုကရေစီနဲ့ ငြိမ်းချမ်းရေးကို လိုလားသူတယောက်ဖြစ်သလိုကျောင်းသားလူငယ်
တွေရဲ့ ဖြူစင်တဲ့ပေးဆပ်မှုတွေ အနစ်နာခံမှုတွေကို ဂုဏ်ယူလေးစားသူတယောက် ဖြစ်တာကြောင့် အခု လိုကဗျာနဲ့ ဂုဏ်ပြုထားပါတယ်။
ကဗျာရေးပြီးသွားတဲ့အချိန်က 03-September-1998 ဖြစ်ပါတယ်။
ကဗျာရဲ့ခေါင်းစဉ်က ပန်းချွေစခန်းမှသည် ရှေ့သို့ချီ ဖြစ်ပါတယ်။ ဒီကဗျာကိုBBC Burmese Section က စီစဉ်ထုတ်လွှင့်တဲ့ အလင်္ကာပန်းခင်းကဏ္ဍကို05-July-1999 ရက်စွဲနဲ့ပို့ပေးလိုက်တယ်ဆိုတာ
ကဗျာအောက်မှာ မှတ်သားထားတာတွေ့ရ,ပါတယ်။

ပန်းချွေစခန်းမှသည် ရှေ့သို့ချီ
(အောင်ဇေ)

ကောင်းကင်မှာစိန်ကြယ်
ကျောင်းပရဂုဏ်မှာတော့ စိန်ချယ်
လေအလှုပ်
ဖြုတ်ကနဲကြွေ
စိန်ချယ်လေလား?
စိန်ကြယ်လား?

မပီဝိုးဝါး မိုးဖွဲကြားမှ
ပြေးလွှားဆော့ကြမ်း လေသရမ်းကြောင့်
စိန်ပန်းနီနီ ကြွေလေပြီလား?

မပီဝိုးဝါး နှင်းမှုံကြားမှ
ဖမ်းစားနှိပ်စက် သူ့စနက်ကြောင့်
မြေထက်သက်ကြွေ ကြယ်ပွင့်တွေလား?

မပီဝိုးဝါး တိမ်ခိုးကြားမှာ
မာန်အားမလျှော့ ခရီးသော့နှင်
မိုးကောင်းကင်မှ
ငွေစင်ကြယ်လား?
စိန်ပွင့်လား?

ဟိုတကွက် သည်တကွက်
စိန်ပန်းခက်မှ အနီစက်တွေ
ပြေးထွက်စုရုံး နီရောင်ဖုံးသည့်
ရုပ်လုံးစုပေါင်း ခွပ်ဒေါင်းအလံ
ကောင်းကင်ယံမှာ အောင်လံလွှင့်ထူ
ရှေ့ တူ ရှုသို့။

အောင်ဇေ

ကဗျာဖေါ်ပြခွင့်ပြုတဲ့ ဆရာအောင်ဇေ ကို ကျေးဇူးတင်ပါတယ်။