ေကႜါဟ္ေဍခဦုအု္ဟွင္ အွ္လု္ ဆု္ယါင္ၟလါင္လံင္အု္ဖင့္လးယိက္ယိက္ ဏု္ဆိုဒ္မု္လင္မာၟ
စ၀္ေထါဟ္တြၚ (ကႜဳံပိုင္ၟ)
စ၀္ေထါဟ္တြၚ (ကႜဳံပိုင္ၟ)
ဖႜဳံဆိုဒ္ေဖါဟ္သီး ကို၀္အု္ဟွာ အွ္ဆံင္းလာၟဆၚ၊ အု္ယို၀္လု္႓ႜင္ မု္လ၀္ထါင္ယွံင္႓းသာဆု္ဟွာင္ၟဆု္စံင္းဏွ္ ဆာကႜဳ္ သာေဍ ဆု္မာလံင္အင္းလံင္(ျဖစ္ကတတ္ဆန္းလုပ္ေဆာင္မႈ) လု္မိင္ဏွ္ေဆ၀္ၟလွ္၊ ဆု္လု္ မာလံင္အင္းလံင္ဆု္ယို၀္ ယူ႔ယာၟေဏ၀္ၟေသွ္သီးလု္ကါဍၚ လင္ခါင့္ထုက္ လင္ဆို၀္ေဖါဟ္လင္ဆို၀္လီ ဆု္လု္ေယွ၀္လု္႓း႓းလု္ဖး မာပ်ဳက္ေ၀့ ထံင္လု္ အု္ယုက္အုဂ္(ေသသည္အထိ) ေဆ၀္ၟလွ္။
ဆု္လု္ေဖါဟ္သးယို၀္ သာယွာၟေအအင္းသံင္းစၚ႓ို၀္ လု္ဆံင့္ဏး႓းလာၟဏင့္ ေ႓့သာယွာၟဟွယ္ဖႜဴၟဟွယ္၀ါသို၀္ ေယါ၀္ၟေလါဟ္မာဍံင္ပ်ဳက္ေ၀့ ကို၀္မိင္ကို၀္စိင္(က်ိင္)လုက္ဆိင့္လုက္ခႜါေဆ၀္ၟလွ္။
အု္ေခါဟ္စံင္ဏွ္ ဏု္ကဲအု္ေခါဟ္အု္ဏာၟ ဏု္တၚေခါဟ္တၚဏာၟလု္ဟွာ ဏု္ေအမာလံင္အင္းလံင္ဆု္စၚ႓ို၀္ ဏု္ထီ ဏု္ဖဲႜါ ဏု္ေဖါဟ္ဏု္လီသီးလု္ဖး မု္ေယါ၀္ၟဍံင္မု္မာပ်ဳက္ေ၀့အု္ေခါဟ္စံင္ မဲြါမု္ေဟွ၀္ေဏ၀္ၟပု္ဆိုဒ္အု္ဟွင္ၟဟွ ဏွ္ စွ္ဆံင့္မံင္းလင္႓းလာၟကို၀္ဟွာေဍဆၚ။
ပု္ယွာၟလု္အု္၀ီၟ သံင္းေလါဟ္အု္ေဖါဟ္လီ ေဍလု္၀ၚ ေ႓့ေသွ္သို၀္လဲစၚ႓ို၀္
ထီ့ကါင္းဏွ္ ေလ၀္႓းလု္ေဃွ၀္
ဟု္ေအေလ၀္ ဟု္သာ၀ုဲၟေမ၀္
ေယါ၀္ၟလင္ဍး ဏု္ခင္းေအေဟွ၀္
ခင္း႓းကိုင္ ဏု္ေဏ၀္ၟေဍေစ၀္
ဟု္ေအေလ၀္ ဟု္သာ၀ုဲၟေမ၀္
ေယါ၀္ၟလင္ဍး ဏု္ခင္းေအေဟွ၀္
ခင္း႓းကိုင္ ဏု္ေဏ၀္ၟေဍေစ၀္
ေ႓့သို၀္ ပု္ယွာၟသံင္းေလါဟ္ပု္သို၀္ ဆု္လု္ထီ့ကါင္းယို၀္ မဲြါဆု္ဏွ္လဲ?
ဆု္လု္မဲြါလု္တဝ္႓းလု္ဖး ဆ္ုမာလံင္အင္းလံင္ဆု္သီးလု္ဖး ပၞာ့ေ႓့ထီ့ေခႜါဟ္ကါင္းသို၀္ေဆ၀္ၟလွ္၊ ဆုိဒ္ဃွာၟဃွံင္ဆု္ ဃွီ႔ဆ္ုလာလု္ဖး ပု္ေအသာကုဲ ပု္ေအပါထု္ယ၀္ၟစၚ႓ို၀္ အင္း႓းအု္ဆးေအးေဆ၀္ၟလွ္၊ အု္ေခါဟ္စံင္ဏွ္ ပု္ဖီ့ဖူ႔ထူ႐ူ႔မုင္ၟ ႓်ာလု္ဖး မ၀့္ဃွင္ေဍပု္ခင္း (ပု္ဆိုဒ္အ္ုထၚအု္႓ံင္) ဏွ္တာၟ ပု္ေအေယါ၀္ၟေဟွ၀္ ပု္ဆု္ဃွီ႔ဆု္လာၟထူ႐ူ႔မုင္ၟ႓်ာ စၚ႓ို၀္ ထံင္မူၟလု္ဏီ ဆု္႓းကိုင္ထုက္ပု္ဆု္ဃွီ႔ဆု္လာယို၀္ မု္ေဍါဟ္ယွာၟထင္းထ၀့္ေဏ၀္ၟေ၀့ပု္ေဆ၀္ၟလွ္။
ဆု္လု္ယွာၟလု္ဖႜဳံသီးယုိ၀္ လ၀္ဆု္ေဍအု္ဍံင္ေဆ၀္ၟလွ္၊ ပု္ေအလု္ပါတိင့္႓း ပု္ေအလု္ပါကာ႓း စၚ႓ို၀္ဍဴ ဆု္ကးဆု္ဟွယ္ ေဍဆု္ဒၵဳက္နဳင့္ဏာသီးလု္ဖး ပု္မု္ဍးပၡံင္ၟ(ရင္ဆိုင္ႀကံဳေတြ႔) ေ၀့ထီ့ထီ့ဆာဆာေဆ၀္ၟလွ္။
ပု္ယွာၟလု္၀ီၟခါ့ဍးအို၀္ မာလံင္အင္းလံင္ဆု္ေအး၊ မု္အင္းဆု္လု္မိင္မိင္ေဆ၀္ၟစၚ႓ို၀္ အင္းကိင္ဟွံင္မ အင္းေ၀့ေဆ၀္ၟ လွ္၊ အ္ုဍံင္လု္မိင္ ဃွဳဂ္လု္ဃွဳဂ္ အု္ဏင့္ဆါၟလု္အွ္႓းဏင့္ မု္အင္း႓းသာစၚ႓ို၀္ လ၀္ဟွိဳင့္ေ၀့ေအဟွံင္မ အင္းကိင္း အင္းေ၀့ေဆ၀္ၟလွ္၊ စင္လု္ဖႜဳံး(တဲအိမ္)ဖိုင္ အု္ဏင့္ဆါၟေအလု္အွ္႓းဍဴ မု္အင္း႓းသာေမ၀္ေဆ၀္ၟစၚ႓ို၀္ အုဲးထင္းထီ့ (ေရျဖည့္ေပးျခင္း)လု္ ဍၚနံဳၟဖိုင္(ေရအိုး)၊ အင္းဖႜါသိင္းမူၟ(ထင္းခြဲျခင္း) ဟွံင္မ အင္းဖံင့္အင္းေမ၀္ဟွံင္ အင္းေ၀့ ေဆ၀္ၟလွ္၊ အင္းဖံင့္အင္းထိင္ၟအင္းအ၀္သယ္ေအဟွံင္ဍဴ အုဲးဃွဦဳေဖွ္ထါင္ေ၀့ထီ့ဏွ္ေဆ၀္ၟလွ္၊ေ႓့သို၀္စင္(က်င္)ဆါၟ မု္ေသွ္ယါ့သို၀္အု္ဟွင္ၟ မာဏါင္းေ၀့ဆု္လု္မိင္ေဆ၀္ၟလွ္။
လု္ယါ့ခါ့ (အတိတ္ကာလ) ပု္ယွာၟသီးလ္ုဖး အု္ေဒၢတ္ပု္၀ါ(အက်င့္စာရိတၱ) သီးလု္ဖးအွ္၀ယ္လာၟဏင့္ ခါ့စူးယါ့ (ပစၥဳပၸန္ကာလ) ယို၀္ ပု္လု္ဖးမဲြါမာပ်ထဦု႔ မု္အွ္ဍၚဟွ ဏွ္လ၀္႓းေအးေဆ၀္ၟ။
ကု္ယဲါ မႝီဟ္လု္ဟွာအု္စူးဖံင္းခင္းမာ(လူတဦး၏ကိုယ္ပိုင္ပစၥည္း) သီးမ ဍဴးယွံင့္(ေရွာင္ၾကဥ္)ဍၚစၚ႓ို၀္ မႝီဟ္အးဟွာ အု္စူးဖံင္းခင္းမာ(လူအမ်ားစုပိုင္ပစၥည္း) လု္ဖးစၚ႓ို၀္ မု္ပါေဍါဟ္ယုဂ္ယာန္း(ေလးစားလိုက္နာျခင္း)ဖ၀္ၟ႓ုဂ္လဲဏွ္ ပု္ဆံင့္မံင္းမု္႓းေ၀့ေဆ၀္ၟလွ္။
ဖႜဳံဆိုဒ္သာ႓င္း အဲဆု္ဃွီ႔ဆု္လာဆါၟသီးကို၀္ဟွာေဍဆၚ၊ ပု္ဆိုဒ္ထိုင့္ဆိုဒ္သာ့ အု္သာ႓ံင္ ေကႜါဟ္ေဍခုဦ အု္ဟွင္ ေအအွ္လု္ ဆု္ယါင္ၟလါင္လံင္အု္ဖင့္လးစၚ႓ို၀္ ဏု္လု္ဟွာ ဏု္သာမု္အွ္ ေ႓့ေသွ္သို၀္လဲ? ဏု္မု္မာေ႓့ေသွ္သို၀္လဲ? တင္ဆိုင့္ထါင္(အေျဖ) မု္ေသွ္ေဆ၀္ၟဟွ? လု္ခါင့္စူးယါ့(ေနာင္အနာ ဂါတ္) ဆု္မာလံင္အင္းလံင္ဆု္ ေအအွ္အး အးေလံဍၚစၚ႓ို၀္ ယိက္ယိက္ဏု္ဆိုဒ္ မု္လင္မာၟေ၀့ေဆ၀္ၟလွ္။
စ၀္ေထါဟ္တြၚ(ကႜဳံပိုင္ၟ)
ေကါ၀္ၾတာ္ ခင္းထၚလး
ေကါ၀္ၾတာ္ ခင္းထၚလး
0 comments:
Post a Comment