လူထုဦးလှ ရာပြည့်ပွဲ
ဂျပန်ရောက်ဗမာလူငယ်တွေ ပြင်ဆင်နေတဲ့ လူထုဦးလှရာပြည့်ပွဲအကြောင်းသတင်းကို
ဦးဦးဖျားဖျားပြောပြချင်ပါတယ်။
လူထုဦးလှဟာ ၁၉၈၂ ခုနှစ် သြဂုတ်လ ၇ရက်နေ့မှာ ကွယ်လွန်ခဲ့တာဆိုတော့ အခုဆိုရင်
၂၇နှစ်ရှိခဲ့ပါပြီ။
လူထုဦးလှကို ၁၉၁၀ပြည့်နှစ်ဇန္နဝါရီ ၁၉ရက် နေ့မှာမွေးခဲ့တာဆိုတော့ လာမယ့်နှစ်မှာ
နှစ်၁၀၀ပြည့်တော့မှာပါ။
ဦးလေးလှဟာ အသက်နှစ်ဆယ်အရွယ်မှာ ဆယ်တန်းအောင်ခဲ့ပေမယ့်၊ တက္ကသိုလ်ကိုဆက်
မတက်ပဲ လူငယ်များကြီးပွါးရေးအသင်းကိုတည်ထောင်ပြီး ပရဟိတလုပ်ငန်းများနဲ့စာပေလုပ်
ငန်းများကို စတင်ဆောင်ရွက်ခဲ့ပါတယ်။
ရန်ကုန်မြူနီစပါယ်ဘောလုံးအသင်းမှာ ဝင်ကစားရင်း၊ လမ်းလျှောက်အသင်း၊ အလေးမ,အသင်း၊
ခြင်းလုံးအသင်းများနဲ့လူငယ်ကလောင်မိတ်ဆွေများအသင်းတို့ကို တည်ထောင်ဖွဲ့စည်းပြီးတော့
ဗမာလူငယ်များဗလငါးတန် ကြီးပွါးတိုးတက်ရေးကို ရှေ့ဆုံးကနေအားထုတ်ဆောင်ရွက်ခဲ့ပါတယ်။
ကြီးပွါးရေးမဂ္ဂဇင်း၊ လူထုဂျာနယ်၊ လူထုသတင်းစာတို့ကိုထုတ်ဝေပြီး နယ်ချဲ့ဆန့်ကျင်ရေး ဖက်ဆစ်
စနစ်ဆန့်ကျင်ရေး အမျိုးသားလွတ်မြောက်ရေးနဲ့ ပြည်တွင်းငြိမ်းချမ်းရေး၊ ကမ္ဘာ့ငြိမ်းချမ်းလှုပ်ရှားမှု
တို့ကိုအားကြိုးမာန်တက်ဆောင်ရွက်ခဲ့ပါတယ်။
ဖက်ဆစ်တော်လှန်ရေးကို ဗိုလ်ဗထူး၊အာဇာနည် ဦးရာဇတ်တို့နဲ့အတူ သက်စွန့်စံဖျားဆောင်ရွက်ခဲ့ပါ
တယ်။
မြေပေါ်မှာ ဖဆပလ အဖွဲ့ကိုပထမဦးဆုံးဖွဲ့စည်းခဲ့သူတဦးဖြစ်ပါတယ်။
ငယ်စဉ်ကတည်းက အရက်၊ လောင်းကစား၊ ဆေးလိပ် စသည်လုံးဝရှောင်ခဲ့ပြီး၊ ထိပ်တန်းဥပဒေများကို
အထူးလေးစားလိုက်နာခဲ့ပေမယ့်၊ ထောင်ငါးကြိမ်ကျခဲ့ဘူးပါတယ်။
ထောင်ထဲမှာလည်း အားကစားနဲ့စာပေအသင်းများကိုဖွဲ့စည်းလှုပ်ရှားခဲ့ပါတယ်။
ထောင်ကထွက်တော့ ထောင်တွင်းကရခဲ့တဲ့ တိုင်းရင်းသားပုံပြင်တွေ ပေးစာတွေနဲ့ အကျဉ်းသား
အထုပ္ပတ္တိတွေကို ရေးသားထုတ်ဝေပါတယ်။
ထောင်ဝတ္ထုတအုပ်ဟာ UNESCO စာပေဆုရခဲ့ပါတယ်။
စာအုပ် ၁၀၀လောက်ထုတ်ဝေခဲ့တဲ့အထဲမှာ တိုင်းရင်းသားပုံပြင်တွေက ၅၀လောက်ရှိပါတယ်။
အကြီးကျယ်ဆုံးထောင်ဝတ္ထုရေးဆရာ၊ အကြီးကျယ်ဆုံး ပုံပြင်ရေးဆရာ၊ အကြီးကျယ်ဆုံး ပေးစာ
ရေးဆရာဖြစ်ခဲ့ပါတယ်။
လူထုသတင်းစာအပိတ်ခံရတော့ သတင်းစာများသည်သမိုင်းကိုပြောနေကြသည် စ,တဲ့ခေတ် အဆက်ဆက်သတင်းစာတွေထဲက ဖတ်သင့်သိသင့်တာတွေကို ဖြတ်ယူစုပေါင်းပြီးစာအုပ်တွေ ထုတ်ဝေခဲ့ပါတယ်။
ဗမာ့လူမှုဘဝထဲက ကျွန်တော်လှေသူကြီး၊ ကျွန်တော်ဗျူရိုကရက်၊ ကျွန်တော်သတင်းထောက်
စ,တဲ့ ကျွန်တော်စာအုပ်တွေကိုလည်း အများကြီးထုတ်ဝေခဲ့ပါတယ်။
ဦးလေးလူထုဦးလှမှတပါး ဒါမျိုး ဘယ်သူမှမလုပ်နိုင် မလုပ်ခဲ့ပါဘူး။
ပါမေက္ခချုပ်ဦးကျော်ရင် သမိုင်းပါမောက္ခဒေါက်တာသန်းထွန်းတို့နဲ့အတူ လူငယ်စာရေးဆရာများကိုရှေ့ဆောင်ပြီး ဗမာစာရေးသားချက်အပေါ်
စကားပြောသလိုရေးခြင်းကိုလည်း လမ်းသစ်ဖေါက်ခဲ့ပါတယ်။
ဦးလေးလူထုဦးလှဟာ ဗမာပြည်မှာအကြီးဆုံး ပရဟိတသမား၊ နယ်ချဲ့ဆန့်ကျင်ရေး
ဖက်ဆစ်ဆန့်ကျင်ရေး ငြိမ်းချမ်းရေးသမားကြီးတဦးအဖြစ် အများကအသိအမှတ်ပြု
ခံရသူဖြစ်ပါတယ်။
လူထုဦးလှရာပြည့်ပွဲကို လှိုက်လှဲုစွာကြိုဆိုလိုက်ရပါကြောင်း။
မောင်စွမ်းရည်
VOA ကနေပြီးဆရာမောင်စွမ်းရည်အသံလွှင့်ပြောသွားတဲ့ စကားတွေကို ပြန်ရေးထားတာပါ။
မင်းစိုးစံ
အဝေးရောက် ကရင်ဒုက္ခသည်တဦး
0 comments:
Post a Comment